Almatyda áriptesin basynan atyp óltirgen Azamat Beristemov 11 jyl 3 aiǵa sottaldy, dep habarlaidy QazAqparat tilshisi.
Mamandandyrylǵan aýdanaralyq sotynyń sýdiasy inspektor Azamat Beristemovti 11 jyl 3 aiǵa bas bostandyǵynan aiyrý týraly úkim shyǵardy.
Eske salaiyq, 2018 jyly qyrkúiek aiynyń sońyna qarai Almatyda Jergilikti politsiia inspektory Azamat Beristemov óziniń áriptesi Sábit Beglanulyn atyp tastaǵan bolatyn. Jaraqat alǵan Sábit Beglanuly sol kúni, túngi saǵat 22.00-de aýrýhanada kóz jumdy. Keiin tártip saqshylarynyń bir-birine týys ekendigi anyqtaldy. Atalǵan oqiǵaǵa bailanysty QR Ishki ister ministri Qalmuhanbet Qasymov pikir bildirgen bolatyn.
«Kúdikti kezekshilikke kelip, qarýdy qabyldaǵan. Keiin garajdan avtokólikti alýǵa shyqqan kezde, ol kúieý balasymen jolyqqan. Kóz jumǵan qyzmetker kezekshiligin tapsyrýǵa kelgen. Sońǵy alty ai merzimde ol otbasymen birge turmaǵan kórinedi. Keshqurym qyzmetkerler kezdesip qalǵan kezde janjal týyndap, sonyń saldarynan birinshisi qarýdan oq atqan», - dep naqtylady vedomstvo basshysy.
Óziniń áriptesi, ári kúieý balasy Sábit Beglanulyn atyp óltirgen inspektor Azamat Beristemov osydan bir jyldai ýaqyt buryn ákesinen aiyrylǵan. 2018 jyly 31 naýryzda Taldyqorǵan oblystyq qorǵanys departamentiniń basshysy Berdibek Beristemovti óziniń orynbasary kabinetinde atyp óltirgen bolatyn.
«Bizdegi qyzmetkerlerdiń barlyǵy jyl basynda testileýden ótedi. Beristemov te ótti. Onyń ákesi oqqa ushqan soń, biz ony mamyrda taǵy testileýden ótkizdik. Áńgimelestik. Testileý nátijesinde onyń deni saý bolyp shyqty. Ol psihologiialyq turǵydan turaqty, kúizeliske tózimdi kórindi. Ol tym senimdi, ózin-ózi óte joǵary baǵalaityn. Tik minezdi, qyrsyqtyǵy da bar edi. Sonymen qatar, adamdarmen jaqsy til tabysatyn, dostary da kóp edi», - dedi Albina Saǵatbaev.
Al marqum bolǵan Sábit Beglanuly basqa bólimshede qyzmet etken. Ol da psihologiialyq táýekel tobynda bolǵan.
