Qazir Qazaqstannyń kinoteatrlarynda "Oijumbaq-2" mýltfilmi júrip jatqany belgili. Animatsiialyq filmdi kórgender onyń tereń maǵynasy týraly aityp jatyr.
Disney men Pixar-dyń jańa týyndysy 13 maýsymda prokatqa shyqqan bolatyn. Mýltfilmniń qazaqsha dybystamasy kinoteatrda orys tilindegisinen álde qaida az kórsetilip jatqanyna qaramastan, alǵashqy kúni-aq qazaqsha nusqasy kórilim jaǵynan rekord ornatyp, tabysy 10 million teńgeden asty. Sóitip "Oijumbaq-2" byltyr rekord ornatqan "Avatar: Sý joly" animatsiialyq filminiń alǵashqy aptada tapqan tabysynan úsh ese kóp bolyp shyqty.
Animatsiialyq film kórermendi nesimen qyzyqtyrdy?
Filmniń basty keiipkeri Raili jasóspirim shaqqa kelgende pýbertatty jastaǵy ózgerister boiynan biline bastaidy. Ol tez ashýlanyp, tez qaitady. Ózine senimsizdik, uialshaqtyq pen úrei kúsheie túsedi. Filmde Railidiń ishinde jatqan emotsiialary bir-bir keiipker retinde kórsetiledi. Emotsiialar tobyn alǵashynda Qýanysh atty keiipker basqarady. Keiin Railidiń pýbertatty jasyna sáikes jańa emotsiialar qosylyp, olardyń arasynda taitalas bastalady. Aqyry Railidiń boiyn úrei bilep alady da, kóptegen qatelikterge boi aldyrady.
Mýltfilm adam janynyń kúrdeli ekenin, ásirese jasóspirim shaqtaǵy ishki taitalasty ashyp kórsetken. Jaǵymdy da, jaǵymsyz emotsiialardyń barlyǵy bizge - dos. Olarmen úilesimde ómir súrý arqyly ǵana óz bolmysymyzdy tanitynymyz aitylady.
Mýltfilm otbasymen kórýge arnalǵan. Balalar bul filmniń shielenisken oqiǵalary men kúlkili epizottaryna mán berse, eresekter jasóspirimderdiń ishki kúiinde ne bolyp jatatynyn túsingendei boldy.
Aiarý. 10 jasta
Maǵan Qýanysh degen keiipker unady. Ol árqashan pozitivti jáne súikimdi. Sosyn, Uiat degen keiipker unady. Onyń uialyp, jerge búrkenip jata qalatyny sondai kúlkili boldy. Biraq Úreidiń pýltty basqara almai qalǵan sáti qorqynyshty.
Gúlnár. 39 jasta
Men ózim Disney-diń mýltfilmi qazaq tiline dybystalypty degendi estigende birden qyzymdy alyp kelýdi oiladym. Sebebi qazir balalarǵa arnalǵan kontent kóbine orys tilinde ǵoi. Balalarymyz kóbinese orys tildi kontentti tutynady. Mýltfilmniń qazaqsha aýdarmasy da, dýbliajy da maǵan qatty unady. Odan bólek, mýltfilmdi kórip otyryp, ózimniń jasóspirim balalarym eske tústi. Olar da Raili siiaqty emotsiianyń jeteginde júr ǵoi. Olarmen endi abailap sóileseiin degen oiǵa keldim.
Gúlnár bul jai ǵana kezekti dýbliajdardyń biri emes, qazaq tiliniń elimizde damýyna úles qosý dep sanaidy.
"Oijumbaq-2" Disney kompaniiasy óz esebinen qazaq tiline aýdaryp, dybystaǵan alǵashqy mýltfilm ekenin aita ketý kerek. Kompaniia budan bólek "Moana 2", "Mýfasa: Arystan patsha" animatsiialyq filmderin óz qarajatyna memlekettik tilge aýdaryp otyr. Eger osy mýltfilmderdiń kórilimi jaqsy bolsa, Disney stýdiiasy budan keiin de týyndylaryn qazaq tiline aýdaryp shyǵaratyn bolady.
Aita keteiik, "Oijumbaq 2" keiipkerlerin ánshi Juldyz Tólepbergen men Ninety One tobynyń solisteri Batyrhan Málik pen Azamat Ashmaqyn qazaqsha dýbliajdaǵan.
