El aýmaǵynda jyl saiyn kóktem men kúzde aǵash otyrǵyzý aktsiiasy qarqyndy júrip keledi. Osy oraida sol otyrǵyzylǵan aǵash túpteriniń qansha paiyzy jersinip, nátijesin berip jatyr? Bul suraqqa QR Ekologiia, geologiia jáne tabiǵi resýrstar vitse-ministri Áliia Shalabekova jaýap berdi, dep habarlaidy QazAqparat.
«Bizdegi otyrǵyzylǵan aǵash túpteriniń jersiný kórsetkishi 65% quraidy. Eger jyl qurǵaq nemese qatty aiaz bolsa, onda kóshetter óspei qalýy múmkin. Óspei qalǵan jaǵdaida ol jerde sol aǵash nemese basqa ósimdik túri otyrǵyzylady. Osy jaittardy eskere kele biz 65% dep boljam otyrmyz. Jalpy egilgen aǵash kóshetiniń tirshiligin jalǵastyrýy klimattyq jaǵdailarǵa bailanysty», - dedi A.Shalabekova Ortalyq kommýnikatsiialar qyzmetinde ótken baspasóz máslihatynda.
Onyń aitýynsha, búginde el aýmaǵynda negizinen sekseýil, qaraǵai, qaiyń, shegirshin jáne taǵy aǵash túrleri otyrǵyzylyp jatyr.
«Mysaly, sekseýildi alsaq onyń jersinýi qiyn, shamamen 20-25% ǵana ulasyp ósip ketedi. Ózderińiz biletindei, atalǵan aǵash túri shóleitti aýmaqtarda ósedi. Sondai-aq, biz búginde Aral teńiziniń qurǵap qalǵan ornynda aǵash otyrǵyzýmen ainalysyp jatyrmyz. Ol jerde sekseýildiń jersinip ketý kórsetkishi 20-25% aspaidy», - deidi ol.
Sondai-aq, vitse-ministr otyrǵyzylǵan aǵash kóshetteriniń ósýi kútimge de bailanysty ekenin aityp ótti.
