Elimizdiń óz táýelsizdigin jariialaǵanyna jiyrma jeti jyl bolsa, osy jyldar ishinde ata-babalarymyz san ǵasyrlar boiy ańsaǵan azattyqqa qoly jetken memleketimizdiń kúndelikti ómirine qajetti kóptegen zańdar jańadan qabyldandy. Solardyń biri - mediatsiia týraly zań desek, osy zańnyń talaptaryna sáikes elimizde mediatsiia qyzmeti keńinen óris jaiyp, óz jumysyn júrgizip keledi.
Mediatsiia qyzmeti - qalyptasqaly beri jer daýy men jesir daýynan kóz ashpaǵan halqymyz úshin jat emes. Kóne tarihqa kóz jiberip qarasaq, dana halqymyzdyń jalpaq tilimen aitqanda bitimger, eki jaqty tatýlastyrýshy tulǵa degen maǵynany beretin mediator qyzmetin minsiz atqarǵan nebir aýzy dýaly Tóle bi, Qazybek pen Áiteke biler jóninde bilýimiz de, bilmeýimiz de ábden múmkin edi. Iia, bul azamattar ózderi ómir súrgen dáýirde nebir kúrmeýi qiyn kúrdeli máselelerdi boilaryna bitken sezimtaldyq, parasattylyq, kóregendilik qasietterimen ádil sheship, halqynyń sanalarynda saqtalyp qalǵandary esh daý týdyrmaidy. Búgingi kúnniń aqsaqaldary men bileri babalardyń jolyn jalǵap, ómirimizge dendep engen mediatsiia qyzmetin atqaryp keledi.
Zań turǵysynan kelgende mediatsiia degen terminniń ózin áli kúnge deiin óz dárejesinde tolyq túsinbeitindigimiz jasyryn emes. Sondyqtan osy máseleni turǵyndarǵa nasihattaýdyń esh artyqtyǵy joq. Osyndai maqsatta respýblikalyq «Ardagerler uiymynyń» baspasóz hatshysy Janat Elýbaev bastaǵan arnaiy nasihattyq top Otyrar aýdanynda bolyp, turǵyndarmen kezdesý ótkizdi.
Kópshilik qaýym úshin berer paidasy mol mundai jiyndy aýdan ákiminiń orynbasary Perdehan Japparqulov ashyp, júrgizip otyrdy. Kún tártibindegi máselege bailanysty top jetekshisi Janat Adaihanqyzy úshinshi, beitarap, ádil, janjal nátijesine múddeli emes taraptyń qatysýymen ótetin daýlardy retteýdiń balamaly jańa túri bolyp tabylatyn mediatsiiaǵa keńinen toqtalyp, túsinik berip ótti.
Taraptardyń shielenis deńgeiin tómendetý jáne daýdyń eki jaqty da qanaǵattandyratyn sheshimine qol jetkizý múmkindikteri týraly keńinen túsindirgen top múshelerine jinalǵan jurtshylyq tarapynan qoiylǵan saýal qoiylyp, usynystar joldandy.
