Búgin Otyrar aýdanynda Elbasymyz N.Á.Nazarbaevtyń «Bolashaqqa baǵdar: rýhani jańǵyrý» baǵdarlamasy aiasynda «Mádeni murany saqtaý jáne qalpyna keltirý máseleleri» taqyrybyndaǵy respýblikalyq ǵylymi-tájiribelik seminary ótti. Seminarǵa elimizdiń ár óńirindegi respýblikalyq, oblystyq mýzei qyzmetkerleri, ulttyq - mádeni ortalyqtar men orta bilim berý mekeme ókilderi, sondai-aq, Otyrar memlekettik arheologiialyq qoryq-mýzeiiniń qyzmetkerleri qatysty.
Seminar jumysyna kelgen qonaqtar aldymen Otyrar memlekettik arheologiialyq qoryq-mýzeiiniń ekspozitsiiasyn aralap, qoinaýy tarih pen shejirege toly kieli óńirdiń bai muralary men qundy jádigerlerimen tanysty.
Seminardyń ashylý saltanatynda aýdan ákimi Erlan Aitahanov quttyqtaý sóz sóilep, mýzei janashyrlarynyń jumysyna sáttilik tiledi.
«Uly Otyrar – Elbasymyz aitqandai qazaq órkenietiniń altyn dińgegi. Ult Kóshbasshysynyń «Bolashaqqa baǵdar: rýhani jańǵyrý» atty baǵdarlamalyq maqalasynda kóterilgen «Qasietti Qazaqstan» jobasyna engen elimizdegi iri týristik baǵdarǵa engen ólke. Osyndai qasietti, ińkár ólkedegi taýsylmaityn qazyna bolǵan mýzei muralary ótken tarihymyzdy bolashaqqa jetkizýshi qundy derekkózi bolmaq.
Elbasymyzdyń «Uly dalanyń jeti qyry» atty maqalasy da Otyrardyń tarihyna tyń serpin bermek. Maqalada «Keńistik – barlyq nárseniń, al ýaqyt – búkil oqiǵanyń ólshemi. Ýaqyt pen keńistiktiń kókjiegi toǵysqan kezde ult tarihy bastalady» dep kórsetken Ult Kóshbasshysy tereń mazmundy, taǵylymy mol maqalasy arqyly qalyń buqarany bir serpiltip tastady. Tylsym tarihtyń jeti qyryna toqtalyp, ótkeni¬mizdi tarih tuǵyrynan baǵamdap, tereń zer¬deleýge, onyń kúrmeýli túiinin sheshýge múmkindik týǵanyn jetkizip, salt-dástúrimizdi jańǵyrtyp, ótkenimizge qurmetpen qaraýǵa shaqyrdy. Bul ózindik bai tarihymen, Ál-Farabidei ǵulamasymen búkil álemge áigili óńirge degen týristerdiń qyzyǵýshylyǵyn arttyryp, óziniń qaharman qorǵaýshylarymen, óshpes dańqqa bólengen batyrlyqtyń, otansúigishtiktiń teńdesi joq úlgisine ainalǵan qalany tanytýǵa úlen múmkindik» - dedi aýdan basshysy óz sózinde.
Jalpy Otyrar aýdanynda 200-ge jýyq tarihi-mádeni eskertkishter bar. Búgingi tańda, qundy eskertkishterimizdi saqtaý, qorǵaý maqsatynda Otyrar memlekettik arheologiialyq qoryq-mýzeiimen tyǵyz bailanysta jumystar júrgizilýde. Atap aitar bolsaq, árbir aýyl okrýgteriniń aýmaǵyndaǵy tarihi tóbelerdiń qadaǵalaý maqsatynda arnaiy qyzmetkerler bólinip, baqylaýǵa alynǵan. Biyl QR Mádeniet jáne sport ministrligimen birlesip, aýqymdy jumystar qolǵa alynyp, Babtardyń baby – Arystanbab kesenesi men Otyrar tóbe mańynda abattandyrý, kógaldandyrý jumystary bastalyp ketti. Keler jyly qurylys jumystary tolyǵymen aiaqtalyp, aýdanǵa kelýshi týristerge qolaily jaǵdai jasalynbaq.
Seminar barysynda osy jaittardy da tilge tiek etken aýdan ákimi «mýzei muralary – taýsylmaityn qazyna, telegei teńiz, derekkózi, ony zerttep halqymyzdyń ótken ómiri men bizge qaldyrǵan asyl muralaryn keler urpaqqa jetkizý bizdiń basty muratymyz» dep, sózin qorytyndylady.
Munan soń seminarǵa kelgen meimandar Elbasynyń bastamasymen qabyldanǵan memlekettik «Mádeni mura» baǵdarlamasynda mádeni murany, sonyń ishinde ulttyq mádenietti, dástúrler men ádet-ǵuryptardy zertteý, jinaqtaý mindetteri qaralǵanyn, osynyn júzege asyrý maqsatynda ótip jatqan seminardyń mańyzdylyǵyna toqtalyp, ózderiniń oilarymen bólisti.
