Búgin Qazaqstan Respýblikasy Táýelsizdiginiń 27 jyldyq mereitoiyna orai Túrkistan oblysy Otyrar aýdany Sháýildir eldi mekeninde "Arys jaǵalaýy" saiabaǵy jáne Keńes Odaǵynyń batyrlary men Uly Otan soǵysy ardagerlerine arnalǵan memorialdy keshen ashyldy, dep habarlaidy "Ult aqparat" óńir basshysynyń baspasóz qyzmetine silteme jasap.
Saltanatty sharaǵa Túrkistan oblysy ákiminiń orynbasary Tólegen Sársembaev pen Otyrar aýdanynyń ákimi Erlan Aitahanov, aýdannyń ziialy qaýym ókilderimen batyr S.Áshirovtyń jubaiy áje qatysyp, lentasyn qidy.
- Búgin biz 16 jeltoqsan – Qazaqstan Respýblikasynyń Táýelsizdik kúni qarsańynda saltanatty túrde ashyp turǵan memorialdyq keshen – qan maidanda tolarsaqtan saz keshken maidangerlerge qurmet dep bilemiz. Bul kúnderi sol eskirmes estelikter, kózi tiri ardager-aqsaqaldardyń júregin mazalasa, sum soǵys salǵan qandy qyrǵyn jaily tek ardagerler aýzynan estip bilgen keiingi jastardyń da janyn tolqytady. Otanǵa, týǵan jerge, elge degen súiispenshilik myńdaǵan qazaqstandyqtardyń tula boiynan jalyndap turdy. Búgingi ardager – keshegi jaýynger. Ol kezde nebári 19-20 jastaǵy azamattar ata-babasynyń batyldyǵyn, batyrlyǵyn, erjúrektigin boiyna sińirip ósken qazaq jaýyngerleri, batyr aǵalarymyz, jastyǵyna qaramai bir qiyrda jan alysyp, jan berisip, keskilesken urystarǵa qatysyp, keremet erlikter jasady. Barshańyzdy El Táýelsizdiginiń 27 jyldyǵymen jáne búgingi tarihi nysandardyń ashylýymen quttyqtaimyn!, - dedi oblys ákiminiń orynbasary Tólegen Sársembaev.
Nysannyń maqsaty - ózen jaǵalaýyn sýdyń buzýynan saqtaý, ári jaiaý júrginshiler serýendeitin saiabaq ornata otyryp aýdan turǵyndary jadyna máńgilik tarihi tulǵalar beinesin dáripteý bolyp tabylady.
- "Arys jaǵalaýy" saiabaǵy tórinde otyrarlyq qos qaharman, Keńes Odaǵynyń batyrlary Seiitqasym Áshirov pen Temirbek Ibragimovtardyń at ústindegi eskertkishteri ornatylǵan. Al eskertkishti ainala ekinshi dúniejúzilik soǵysyna attanǵan 3866 otyrarlyq maidangerdiń esimderi mármár taqtaǵa oiylyp jazylǵan. Qos batyrdyń biri jaiaý ásker qatarynda, ekinshisi barlaýshy bolyp maidanǵa kirgen. Eskertkishtegi batyrlardyń atústinde jasalý sebebi, erjúrek babalarymyz ǵasyrlar boiy syrtqy jaýyna at ústinde júrip toitarys berip elin, jerin qorǵaǵan. Otyrarlyq qos batyrymyz - uly babalardyń urpaǵy ári zańdy jalǵasy. Elbasymyz Nursultan Ábishuly Nazarbaevtyń «Uly dalanyń jeti qyry» atty maqalasynda da atqa miný mádenieti týraly airyqsha sózi bar. Jaýjúrek babalar - bizdiń maqtanyshymyz, urpaqtyń maqtanyshy. Olardyń esimderi máńgilik el esinde saqtala bermek, -dedi aýdan ákimi Erlan Aitahanov.
Saltanatty jiynnan soń Otan úshin ot keship, qurban bolǵan bozdaqtarǵa arnap as berilip, Quran baǵyshtaldy.
