Qyrǵyzstan prezidenti bolǵan Roza Otýnbaeva "Habar" telearnasyndaǵy "Bitimgershilik missiiasy. Qyrǵyz daǵdarysy" derekti filminde Qyrǵyz elindegi memlekettik tóńkeristen keiin Nursultan Nazarbaevtan qandai keńes alǵanyn aityp berdi, - dep habarlaidy kaz.tengrinews.kz tilshisi.
"Bul kezde maǵan Vashingtonnan Nursultan Nazarbaev telefon soǵyp, bylai dedi: "Qyrǵyzstandaǵy jaǵdaidy talqylap jatyrmyz, ne bolǵanyn. Medvedev, Obama, men. Aqyldasa kele, Bákievti bosatqandaryńyz durys bolady degen sheshimge keldik. Elden shyǵarsańyzdar. Sonda eldiń jikke bóliný qaýpi keter edi". Bul áńgime jaily ýaqytsha úkimet múshelerine aittym, alaida ýaqytsha úkimette árkimniń pikiri árqandai boldy", - dep eske alady Otýnbaeva.
Ol ýaqytsha úkimet músheleriniń sheshim qabyldaýdan bas tartqanyn, sondyqtan jaýapkershilikti ózine alǵanyn atap ótti.
"Sheshim qabyldaý qajet boldy, bul óte shuǵyl edi, osy sheshimdi ýaqytsha úkimet basshysy retinde men qabyldadym. Meni áli kúnge deiin Bákievti elden shyǵarý týraly sheshim qabyldaǵanym úshin aiyptap keledi. Ony adam óltirgen dep aiyptaidy, biraq túsinesizder me, qaza bolǵandardyń ata-anasynyń, týystarynyń kóńili úshin "Qylmyskerdi jazasyz jibere salǵan kim? Mine, Otýnbaeva jibere saldy" degen másele búginde túrli múddeniń óz maqsatynda paidalanyp aitatyn taqyrybyna ainaldy. Menińshe, sol kezde Bákievti shyǵaryp jibermesek, qatelikke boi aldyrar edik", - dedi ol.
Sonymen qatar, Qyrǵyzstannyń eks-prezidenti Qurmanbek Bákiev qarýly tóńkeristiń nelikten kútpegen jaǵdai bolǵanyn aityp berdi.
