Parlament Senatynyń jalpy otyrysynda «Eýraziialyq ekonomikalyq odaq pen QHR-dyń kedendik shekaralary arqyly ótkiziletin taýarlar men halyqaralyq tasymaldyń kólik quraldary jóninde aqparat almasý týraly kelisimdi ratifikatsiialaý týraly» Zańy qabyldandy, dep habarlaidy QazAqparat.
Kelisimge 2019 jylǵy 6 maýsymda Peterbýrg halyqaralyq ekonomikalyq forýmynyń aiasynda Eýraziialyq ekonomikalyq keńes alqasynyń tóraǵasy, Odaqqa múshe memleketterdiń vitse-premerleri jáne Qytai Halyq Respýblikasynyń Syrtqy ister ministri qol qoidy.
«Kelisimniń erejeleri aqparat almasýdyń negizgi kezeńderin, taraptardyń ózara is-qimyl tetigin jáne málimetterdiń kólemi men quramyna qoiylatyn talaptardy retteidi. Jeke tulǵalardyń jeke paidalanýyna arnalǵan taýarlardy qospaǵanda, syrtqy ekonomikalyq qyzmetke qatysýshylardyń eksporttyq jáne tranzittik deklaratsiialary boiynsha ózara derektermen almasý kózdelgen. Aqparat almasý Eýraziialyq ekonomikalyq odaqtyń integratsiialanǵan aqparattyq júiesi men Qytaidyń ýákiletti organynyń ulttyq aqparattyq júiesin paidalana otyryp, kóliktiń barlyq túrleri boiynsha elektrondyq túrde júzege asyrylatyn bolady», - dedi Qarjy ministri Erulan Jamaýbaev.
Kelisim kúshine engen kúnnen bastap 18 aidan keshiktirmei málimettiń qurylymyn, formatyn, sondai-aq aqparat almasýdyń tehnikalyq sharttaryn anyqtaityn jekelegen Hattamalarǵa qol qoiylatyn bolady.
Atalǵan Hattamalar Eýraziialyq ekonomikalyq odaqqa múshe memleketterdiń ortalyq keden organdary men Qytai Halyq Respýblikasynyń Bas keden basqarmasy arasynda jasalady jáne odan ári ratifikatsiialaýdy talap etpeidi.
«Osy Kelisim boiynsha aqparat almasý kedendik operatsiialardy júrgizýdi jedeldetýge, alynǵan málimetterdi táýekelderdi basqarý júiesiniń tiimdiligin arttyrý maqsatynda qoldanýǵa jáne kedendik baqylaýdan jaltarý faktilerin anyqtaýǵa múmkindik beredi. Sonymen qatar, qaýipsizdikti qamtamasyz etý maqsatynda eki taraptyń kedendik aýmaqtaryna yqtimal qaýipti, ótkizýge tyiym salynǵan jáne shektelgen taýarlardy ákelýge bailanysty táýekelderdi azaitý kózdelip otyr. Kelisimdi iske asyrý respýblikalyq biýdjetten qarajat bólýdi talap etpeidi», - dedi E. Jamaýbaev.
