Parlament Senatynyń jalpy otyrysynda «Qazaqstan Respýblikasy men Soltústik Makedoniia Respýblikasy arasyndaǵy adamdardy ustap berý týraly shartty ratifikatsiialaý týraly» Zańy qabyldandy, dep habarlaidy "Ult aqparat".
2019 jyly Soltústik Makedoniiamen sharttardyń tolyq paketine qol qoiyldy.
«Olardyń biri - Qazaqstan men Soltústik Makedoniia arasyndaǵy Adamdardy ustap berý týraly shart. Bul Sharttyń negizgi maqsaty – izdeýde júrgen adamdardy qylmystyq jaýapqa tartý úshin ekstraditsiialaý máselesin retteý. Shartta ustap berýdiń kelesi negizderine toqtalsaq, birinshiden, eki eldiń de zańyna sáikes áreket qylmys bolyp sanalýy tiis. Ekinshiden, qylmystyq jaýapqa tartylatyn adam keminde 1 jylǵa bas bostandyǵynan aiyrýǵa jazalanýy qajet. Úshinshiden, sot úkimin oryndaý úshin izdeýdegi adamnyń ótelmegen jaza merzimi keminde 6 ai bolýy kerek», - dedi QR Bas prokýrorynyń birinshi orynbasary Berik Asylov.
Endi, adam ustap berilmeitin negizderge toqtasaq:
- eger suratýshy Taraptyń zańnamasy boiynsha qylmys úshin ólim jazasy kózdelse;
- izdeýdegi adam aqtalǵan bolsa nemese oǵan qatysty qylmystyq qýdalaý toqtatylsa;
- eskirý merzimi ótip ketse;
- izdeýdegi adam sol eldiń azamaty bolsa;
- suratylǵan adam áskeri qylmys jasaǵan bolsa;
- nemese ol násili, dini, saiasi kózqarasy úshin aiyptalýy ne sottalýy múmkin bolsa.
«Qazirgi ýaqytta Soltústik Makedoniia men Qazaqstanda jasyrynyp júrgen adamdar joq. Búgingi kúni Qazaqstan 20 memleketpen ustap berý týraly sharttar jasady. Bolashaqta Malaiziia, Dominikan, Perý, Argentinamen osyndai sharttarǵa qol qoiiamyz. Ótken jyly basqa memleketterge, elimizde jasyrynyp júrgen 64 shetel azamatyn ustap berdik. Al, bizge basqa elder 56 qylmyskerdi qaitardy», - dedi B. Asylov.
