Sáýir aiynda epidemiiaǵa qarsy is-sharalarǵa qatysqan, soǵan sáikes ústemeaqy alatyn meditsina qyzmetkerleriniń sany naýryz aiymen salystyrǵanda 17,7-den 42,6 myń adamǵa deiin, iaǵni 2,5 ese artty, – dep habarlaidy «Áleýmettik meditsinalyq saqtandyrý qory» KEAQ Nur-Sultan qalasy boiynsha filialynyń baspasóz qyzmeti.
Eseptelgen ústemeaqylardyń somasy da 56%-ǵa kóbeidi. Meditsinalyq qyzmetkerlerge sáýir aiynda 7,6 mlrd teńge (naýryz aiyna – 3,3 mlrd teńgeden astam) tólendi.
Nur-Sultan qalasy boiynsha sáýirde epidemiiaǵa qarsy is-sharalarǵa tartylǵan meditsina qyzmetkerlerine 1,1 mlrd teńge ústemeaqy tólendi. Ústemeaqy mólsheriniń aitarlyqtai ósýi sáýir aiynda koronavirýs boiynsha epidemiialyq jaǵdaidyń nasharlaýyna bailanysty boldy. Sáikesinshe, naýryz aiymen salystyrǵanda sáýirde meditsina qyzmetkerleri epidemiiaǵa qarsy is-sharalarǵa kóp tartyldy, - dedi "Áleýmettik meditsinalyq saqtandyrý qory" KEAQ Nur-Sultan qalasy boiynsha filialynyń direktory Aidar Seiitqazinov.
Esterińizge sala keteiik, Densaýlyq saqtaý ministrliginiń buiryǵy boiynsha epidemiiaǵa qarsy is-sharalarǵa qatysatyn meditsina qyzmetkerleri 3 táýekel topqa bólingen. Olarǵa jumys kestesine sáikes 212,5 myń teńgeden (5 ETJ) 850 myń teńgege deiin (20 ETJ) ústemeaqy tólenedi. Jalpy, bul maqsatqa respýblikalyq biýdjetten 35,7 mlrd. teńgeden astam qarajat bólingen.
Epidemiialyq jaǵdaidy eskere kele, boljam boiynsha mamyr aiynda ústemeaqy tóleýge 8,6 mlrd teńge jumsalýy múmkin.
