Foto: Sputnik Qazaqstan
Senat tóraǵasy Máýlen Áshimbaev elimizde otbasyndaǵy zorlyq-zombylyqqa jol bermeý máselesine qatysty pikir aitty, dep habarlaidy Kazinform.
«Keiingi jyldary osyndai qylmystarǵa jol bermeý baǵytynda zańnamany ózgertkenbiz. Qylmystyq kodekstiń de baptaryn ózgertip, mundai áreketterge jaýapkershilikti kúsheittik. Otbasylarda osyndai jaǵdailardyń aldyn alý úshin birneshe máselege kóńil bólý kerek. Zańnamany ary qarai kúsheitý kerek bolsa, biz oǵan daiynbyz. Biraq bul máseleni tek zańnamany ózgertýmen sheshýge bolmaidy. Atap aitqanda, jastardyń, azamattardyń arasyndaǵy mádeniet deńgeiin de kóterý kerek. Elimizde osy baǵytta úlken jumystardy atqarý kerek dep oilaimyn», - dedi Áshimbaev Senatta tilshiler suraǵyna jaýap bere otyryp.
Onyń aitýynsha, bul baǵytta tiisti memlekettik organdar jumys atqaryp jatyr. Degenmen osy is-qimyldar jetkiliksiz bolýy múmkin.
«Jalpy, túsindirý, aǵartý jumystary kerek ekeni anyq. Mektepterde, ýniversitetterde tárbie jumystaryn kúsheitý kerek. Sebebi kóp másele tárbiege bailanysty. Ózara syilastyq, qurmetteý, qyzdarǵa qol kótermeýdi bala kezinen túsindirgen jón. Sondyqtan bul problemada tárbie jumystaryndaǵy kemshilikterdi kórip turmyz desek, artyq bolmaidy», - dedi Senat tóraǵasy.
Budan buryn habarlanǵandai, biyl 9 qarashada eks-ministr Qýandyq Bishimbaev óz áielin uryp óltirgeni málim boldy.
