Karantin kezinde erli-zaiyptylardyń qorqynyshqa boi aldyryp, ajyrasyp ketýiniń qalai aldyn alýǵa bolady? Bul saýalǵa psihoanalitik Janar Ospanova jaýap berdi, dep habarlaidy QazAqparat.
«Karantin kezinde erli-zaiyptylardyń birge bolýy ózderi úshin paidaly dep oilaimyn. Osyndai kezde adamdar bir-birin jaqynyraq tanidy. Mysaly, jubaiyna kóńil bólýge ýaqyt tappai júrgenin aityp shaǵymdanatyndar bar. Sondai adamdar úshin jaqynyna kóńil bólip, qamqorlyq tanytatyn ýaqyt keldi. Osyndai kezde jii ursysyp qalatyn jubailar da bar shyǵar. Ondai kezde ursysyp otyrǵan ómirlik serigińiz ómirden ótip ketse, ózińdi qalai sezinetinińdi kóz aldyna elestetip kórińiz. Urys-keris kezinde ózińdi ustap, agressiiaǵa jol bermeý kerek. Psihologiiada úsh minýt únsiz qalý degen tehnika bar. Úsh minýt únsiz qala alsańyz úsh saǵat, úsh saǵat únsiz bola alsańyz, úsh kún úndemei júre alasyz. Únsiz qalǵan adam ashý-yzasynyń esh maǵynasy bolmaǵanyn túsinedi. Dál qazirgi karantin jaǵdaiynda bir-birińe túsinistik tanytyp, birlikte bolý kerek», - deidi Janar Ospanova.
Onyń aitýynsha, urys-keristi azaitý úshin bala-shaǵaǵa kóp kóńil bólý kerek.
«Qazir balalar da úide. Olarǵa kóńil bólip, oinap, damýyna kómektesý kerek. Al ózińiz zerigip ketpes úshin kitap oqýǵa bolady. Uialy telefonda kóp otyrý adamdy tez sharshatady, sondyqtan 20 minýt saiyn odan demalý kerek. Sondai-aq, iogamen, dene shynyqtyrýmen, sýret salyp, keste tigýmen jáne ártúrli dámdi tamaq pisirýmen ainalysýǵa bolady. Óziniń psihologiialyq jaǵdaiyn basqara almaityn adam psiholog arqyly boiyndaǵy úrei, qorqynyshynan aryla alady», - deidi psihoanalitik.
