Kollaj: Ult.kz
1993 jyly Birikken Ulttar Uiymy Bas Assambleiasynyń sheshimimen 15 mamyr – Halyqaralyq otbasy kúni dep bekitilgen. Sodan beri 30 jyldan astam ýaqyt boiy bul ataýly kún eń qasterli qundylyqty eske salyp, álemge dáriptelip keledi. QR Sport jáne týrizm ministrliginiń baspasóz qyzmeti sport arqyly tabysyp, otbasyn qurǵan otandyq sportshylardy tizbektepti. Nazarlaryńyzǵa usynamyz.
Nurqoja Qaipanov pen Mariia Sedneva
Foto: Nur.kz
Nurqoja – erkin kúresten álem jáne 3 dúrkin Aziia chempiony. Al jary – halyqaralyq reitingtik jarystardyń jeńimpazy, Qazaqstan chempionaty men Kýbogynyń chempiony.
Ashat Jitkeev pen Elena Pavlova
Foto: Instagram.com
Ekeýi de 2008 jyly ótken Beijiń Olimpiadasyna qatysqan. Dziýdoshy Ashat Jitkeev sol oiyndarda kúmis júldege ie boldy. Sondai-aq ol – álem chempionatynyń qola júldegeri, 2 dúrkin Aziia chempiony, Aziia oiyndarynyń 3 dúrkin qola medal iegeri. Elena – voleiboldan klýbtar arasynda Aziia chempiony, Ispaniia jáne Shveitsariia chempionattarynyń jeńimpazy.
Oljas jáne Áigerim Sáttibaevtar
Foto: Kazpravda.kz
Nurqoja men Mariia siiaqty, Oljas pen Áigerim de bir sport túrimen shuǵyldanǵan. Qazirgi tańda Oljas sporttyq mansabyn aiaqtasa, jubaiy Áigerim áli de sharshy alańda óner kórsetip júr. Ol byltyr Tailand Koroldiginiń Chiangmai qalasynda ótken Aziia chempionatynda qola júlde jeńip alǵan. Sondai-aq Áigerim – kóptegen halyqaralyq týrnirdiń jeńimpazy. Al Oljas – Rio Olimpiadasynyń qatysýshysy, Búkilálemdik boks seriiasynyń (WSB) 2 dúrkin chempiony, Aziia chempiony jáne qola júldegeri. Áskeriler arasyndaǵy álem chempionatynda top jarǵan.
Islam jáne Alina Sátpaevtar
Foto: Baigenews.kz
Islam men Alina – bir sport túrimen shuǵyldanatyn jup. Islam – nysana kózdeýden Parij Olimpiadasynyń jáne jazǵy Aziia oiyndarynyń qola júldegeri, Qazaqstan rekordsmeni, Álem kýboginiń birneshe dúrkin júldegeri. Alina da nysana kózdeý sportynan birqatar jetistikke qol jetkizgen. Atap aitqanda, ol – halyqaralyq jarystardyń jeńimpazy, Qazaqstan Respýblikasy VI jazǵy Spartakiadasynyń, chempionaty men Kýbogynyń chempiony.
Didar Ámiráli men Móldir Jańbyrbai
Foto: Instagram.com
Didar – karateden (WKF) jazǵy Aziia oiyndarynyń 2 dúrkin (kúmis jáne qola) júldegeri, álem chempionatynyń qola júldegeri. Sondai-aq Aziia chempionatynda birneshe márte júlde alǵan.
Móldir – karateden qazaqtan shyqqan tuńǵysh álem chempiony, jazǵy Aziia oiyndarynyń kúmis júldegeri, Aziia chempiony. Eń bedeldi jarys sanalatyn Premer-liga týrniriniń qorytyndysy boiynsha úzdik karateshi atanǵan.
Nariman jáne Aida Qurbanovtar
Foto: ashyq derekkóz
Sporttyq gimnastikamen ainalysatyn Nariman – Parij Olimpiadasynyń kúmis júldegeri, Álem kýbogy kezeńderiniń jeńimpazy. Sondai-aq onyń enshisinde Aziia oiyndarynyń, Islam yntymaqtastyǵy oiyndarynyń, Ýniversiada men Aziia chempionatynyń júldeleri bar.
Gimnast Aida – Islam yntymaqtastyǵy oiyndarynyń jeńimpazy jáne birneshe dúrkin júldegeri, Aziia chempionatynyń qola júldegeri.
Konstantin Malinovskii men Arina Altýhova
Foto: ashyq derekkóz
Ekeýi de bir sport túrimen ainalysyp, byltyr Parij Olimpiadasyna qatysqan. Nysana kózdeýden Aziia chempiondary, Álem kýbogy kezeńderiniń jeńimpazdary jáne birneshe dúrkin júldegerleri.
Dastan men Aisulý Muqashbekovter
Foto: Inform.kz
Dastan – iadro laqtyrýdan Parij Paralimpiadasynyń qola júldegeri. Aisulý – para nysana kózdeýden halyqaralyq jarystardyń jeńimpazy.
Aita keteiik, bul – qazaq sportyndaǵy otbasylardyń bir parasy ǵana. Budan bólek, sport – kóptegen komandany, dostardy otbasy retinde biriktiretin yqpaldy kúsh.
