L.N. Gýmilev atyndaǵy Eýraziia ulttyq ýniversitetinde «Naýryz – halyq birliginiń mádeni kody: zertteý, tujyrymdama, tájiribe» atty halyqaralyq ǵylymi-tájiribelik konferentsiia ótti.
Sharaǵa Qazaqstan Respýblikasyndaǵy IýNESKO ókildigi, Iran Islam Respýblikasy, Túrkiia, Túrkimenstan jáne Tájikstan Respýblikalary elshiliginiń ókilderi, sarapshy mamandar jáne otandyq ǵalymdar qatysty. Konferentsiiada adamzat tarihynda orny airyqsha merekeniń búgingi zamandaǵy mártebesi ǵylymi-praktikalyq turǵyda jan-jaqty zerdelenip, baiyptaldy.
Ǵylymi jiynǵa qatysýshy otandyq jáne sheteldik ǵalymdar naýryztanýdyń qazirgi ózekti máselelerin talqylap, búgin, taiaýda jáne bolashaqta atqarylatyn ǵylymi izdenister men jobalardyń is-josparyn belgiledi.
Qatysýshy ǵalymdar konferentsiianyń tómendegi qararyn qabyldady:
- Naýryznamaǵa bailanysty zertteýler men praktikalyq izdenisterdiń meilinshe tolyq elektrondyq bazasy jasaqtalsyn;
- L.N.Gýmilev atyndaǵy Eýraziia ulttyq ýniversiteti Gýmanitarlyq jáne Áleýmettik ǵylymdar fakýlteti (filosofiia, etnologiia, mádeniettaný baǵyty) tarapynan «Naýryz merekesi: zamanaýi talǵam men talap» atty jumys komissiiasy qurylsyn;
- Sońǵy jyldardaǵy «Naýryz merekesin» atap ótý men júrgizýdiń stsenariileri tarihshy, etnograf, mádeniettanýshy ǵalymdardyń súzgisinen ótip, jinaq túrinde ázirlenip, shyǵarylyp, tiisti oryndarǵa, barlyq kitaphanaǵa taratylsyn;
- Naýryz merekesine qatysty is-sharalar kesheni Táýelsizdik qundylyqtarymen sabaqtastyryla baiyptalyp, keńinen nasihattalsyn;
- «Tarihi Naýryznama» (álemdik antologiia) BUU tilderine aýdarylyp, halyqaralyq keńistikke tanytylsyn;
- Naýryzdyń mán-mańyzyna bailanysty ǵylymi tujyrymdar men qaǵidattar bilim úderisine, ásirese mádeniettaný, filosofiia, etnologiia jáne ónertaný salalaryna engizilsin;
- Parsy jáne túrki mádenietindegi naýryznamaǵa bailanysty tájiribeler, oilar, ǵylymi qorytyndylar álem mádenietinde keń qoldanýǵa múmkindikter jasalsyn;
- Túrkistan óńirinde saqtalǵan kóne eskertkishterdi, sonyń ishinde naýryzǵa qatysty ǵuryptardy zertteýge at salysý;
- Shyǵys elderi men Túrki dúniesiniń halyqaralyq saiasi, ekonomikalyq, mádeni sharalaryn Naýryz merekesine orailastyrý suralsyn;
- Naýryzǵa orai halyqaralyq kitap jáne ulttyq mádeniet kórmeleri uiymdastyrylsyn;
- «Naýryz» tósbelgisin ázirleý, ony qoǵamǵa keńinen taratý jaýapty oryndardan suralsyn;
- Naýryz sharalarynyń búldirshinder men balalarǵa arnalǵan tanymdyq jáne zamanaýi baǵdarlamalary kóbeitilsin;
- Naýryzdyń (merekeniń) tehnologiialyq, aqparattyq, qoldanbalyq mazmunyn, mańyzyn, áleýetin kóterýdi qolǵa alý kerek;
- Qaiyrymdylyq, rahymshylyq sharalaryn Naýryzǵa orailastyrýdy qarastyrý.
Qarar jobasy konferentsiianyń qorytyndy bóliminde oqylyp, talqylanyp, bekitildi.
