Otandyq jáne sheteldik tuqym óndirýshiler arasynda preferentsiialar berý protektsionizm retinde baǵalanýy múmkin. Aýyl shaýrashylyǵy ministriniń birinshi orynbasary Aidarbek Saparov Májilis depýttarynyń saýalyna osyndai jaýap qaitardy, dep habarlaidy "QazAqparat".
Májilis depýttary Amanǵali Berdalin, Asqarbek Úisimbaev pen Qainar Abasovtyń saýalyna bergen jaýabynda Aidarbek Saparov biregei tuqym óndirisin sýbsidiialaý nege toqtatylǵanyn túsindirdi.
«Tuqym sharýashylyǵyn damytýdy sýbsidiialaý sharty boiynsha tuqym satyp alýǵa ketken shyǵyndardy aqparattyq júiede elektrondyq shot-faktýralardy usyna otyryp dáleldeý qajet. Osyǵan bailanysty elitalyq tuqym ósirý sharýashylyqtaryna naqty ótkizilgen biregei tuqymdardyń kólemi sýbsidiialanady. Biregei tuqymnyń ózindik óndirisin sýbsidiialaý kezinde aqparattyq júiede júrgizilgen kólemdi qujattardyń kómegimen rastaý máselesi týyndaidy. Osyny eskere otyryp biregei tuqym óndirisin sýbsidiialaý orynsyz bolyp tabylady», - dedi vitse-ministr.
Sondai-aq, ol otandyq tuqymǵa beriletin sýbsidiianyń kólemin shetelden alatyn tuqymǵa tólenetin sýbsidiiadan artyq etip belgileý múmkin emestigin eskertken.
«Otandyq selektsiia suryptaryn sýbsidiialaý normativteri týraly aitsaq, otandyq jáne sheteldik óndirýshiler arasynda preferentsiialar berý otandyq óndirýshilerdiń protektsionizmi retinde baǵalanýy múmkin Qazaqstannyń DSU-ǵa músheligi sheńberinde osy sharany qabyldaý qolaisyz ekenin atap ótemiz», - dedi Aidarbek Saparov óz jaýabynda.
