QR Ulttyq Olimpiadalyq komiteti otandyq sportshylardy koronavirýstan saqtandyrý úshin ahýaldyq shtab quryp, jarys kestelerin qaita qaraýda, dep habarlaidy "Ult aqparat".
«Ulttyq Olimpiadalyq komitet otandyq sportshylardyń qaýipsizdigin qamtamasyz etý úshin barlyq sharalardy qolǵa alady. Eldiń olimpiadalyq vedomstvosynda koronavirýsqa bailanysty keleńsiz jaǵdaidan saqtaný maqsatynda arnaiy shtab quryldy. Ulttyq quramalardyń jarys jáne jattyǵý kesteleri qaita qarastyrylýda», - delingen aqparatta.
Aita keteiik, búgin Memleket basshysy Qasym-Jomart Toqaev Qazaqstan azamattarynyń densaýlyǵyn qorǵaý maqsatynda keshendi sharalar qabyldaýdy tapsyrdy. Osyǵan bailanysty Qazaqstan Ulttyq Olimpiadalyq komitetiniń prezidenti Timýr Qulybaev ulttyq quramalardyń qaýipsizdigin baqylaýdy kúsheitetinin málimdedi.
«Ulttyq Olimpiadalyq komitet úshin sportshylardyń densaýlyǵy óte mańyzdy. Saqtyq sharalarymen qatar, qaýipsizdik sharalaryn da kúsheitý qajet. Bizde ulttyq federatsiialarmen birge koronavirýstyń taralmaýy jáne qazaqstandyq sportshylardy indetten qorǵaý boiynsha aldyn-alý sharalaryna qatysty birtutas jáne berik ustanym bolýy kerek. Aldyn alý sharalarynyń barlyǵyn qoldaný qajet», - dedi Timýr Qulybaev.
UOK basshysynyń tapsyrmasy boiynsha qurylǵan ahýaldyq shtab quramyna túrli departamenttiń qyzmetkerleri kirdi. Arnaiy shtab qyzmetine kúndelikti monitoring júrgizý,qazaqstandyq sportshylardyń qaýipsizdigin qamtamasyz etý úshin usynystar ázirleý jáne qajet bolǵan jaǵdaida shuǵyl sharalar qoldaný kiredi.
Búgin Qazaqstan UOK shtab-páterinde UOK bas hatshysy Sáken Musaibekov, vitse-prezident Andrei Kriýkovtyń basqarýymen memlekettik jattyqtyrýshylar men ulttyq federatsiia ókilderine arnalǵan jinalys ótti. Jiynda ulttyq federatsiialarǵa qazaqstandyq komandalardyń sheteldik oqý-jattyǵý jiyndary men jarystarǵa qatysý kestesin qaita qaraý usynyldy.
Qazaqstan UOK barlyq ulttyq sport federatsiialaryn olimpiadalyq sport túrlerinen jaǵdaidy erekshe baqylaýǵa alýǵa jáne sportshylardyń densaýlyǵyn barynsha qorǵaýǵa shaqyrdy.
