Qazaqstanda otandyq ónimderdi qoldaý maqsatynda «El ishindegi qundylyq» atty jańa uǵym engiziledi. Ónerkásip salasynda talqylanyp jatqan jańa zań jobasyna osyndai uǵym kiriktirilip otyr, dep habarlaidy QazAqparat.
«Otandyq ónerkásiptik ónimdi ótkizý naryqtarynda ilgeriletý kerek. Osy maqsatta zań jobasynda birinshi kezekte ónimderi qosylǵan qunnyń jahandyq tizbegine enýi múmkin sheteldegi mekemelerimizmen jumys isteimiz. Bizdiń kásiporyndarymyz olardy qoldasa eksportqa baǵdarlanǵan ónerkásiptik kásiporyndardy qoldaýǵa shoǵyrlandyrý kerek. Biz eksporttaýshylarymyzǵa syrtqy naryqtardaǵy kedergilerdi (kedendik, ákimshilik jáne basqa da tosqaýyldardy) alyp tastaý máselelerinde de járdemdesýge tiispiz», - dedi Indýstriia jáne infraqurylymdyq damý ministri Beibit Atamqulov Senatta ótip jatqan «QR ónerkásiptik saiasatty zańnamalyq retteý: jai-kúii, problemalary jáne sheshý joldary» taqyrybyndaǵy Úkimet saǵatynda.
Onyń aitýynsha biyldan bastap biz Dúniejúzilik saýda uiymynyń sharttaryna bailanysty jergilikti qamtýdy damytý jónindegi jumys qaita qaralady.
«Osyǵan bailanysty zań jobasymen el ishindegi qundylyq degen jańa uǵym engiziledi. Zań jobasynyń birqatar normalary satyp alýlarda ulttyq standarttardy qoldanýdy monitoringteý arqyly ulttyq ekonomikanyń ózindik qajettiligin qamtamasyz etýge baǵyttalǵan. Sondai-aq, jumys memlekettik satyp alýdaǵy ulttyq rejimnen alyp tastaýdy belgileý baǵyty boiynsha júrgiziletin bolady», - dedi ol.
