Elbasy úndeýimen tarihi Otanymen qaita qaýyshqan qandastar qaýymy atynan barsha baýyrlardy qushaq jaia qarsy alǵan Qazaq halqyna riiasyz rizalyq bildirip, sheksiz alǵys aitqymyz keledi! Bul pikirdi «Otandastar qory» KeAQ vitse-prezidenti Maǵaýiia Sarbasov aitty.
***
«Qazaqstan Respýblikasynyń Tuńǵysh Prezidenti – Elbasy Nursultan Ábishuly Nazarbaevtyń Jarlyǵymen 5 jyldan beri airyqsha qurmetpen atalyp ótetin «Alǵys aitý kúni» - eń aldymen elimizde tynyshtyq pen úndestik, ózara senimdilik pen kúlli Qazaqstan halqyna degen shynaiy qurmettiń ornyǵýyna negiz bolǵan Ult kóshbasshysynyń beibitshilik pen kelisim saiasatynyń saltanatty kúni.
Bul - taǵdyr taýanymen Uly Dalamyzǵa qonys aýdarǵan túrli etnostardyń qutty qonysyna ainalǵan qasietti qazaq jeri men qonaqjai halqymyzǵa jasalǵan taǵzymnyń belgisi. Qazaq halqy qiyn-qystaý zamanda olardyń basyna túsken aýyrtpalyqty qaiyspai birge kótere bildi. Bul búgingi tańda elimizdegi túrli ult ókilderi arasyndaǵy adamgershilik qarym-qatynastyń ónegeli ólshemine ainaldy.
Alǵys aitý kúni - el basyna kún týǵan kúrdeli kezeńdi iyq tirese birge eńserip, táýelsiz Qazaqstandy qurý jolynda aianbai ter tókken barlyq azamattardyń bir-birine qurmet bildiretin kúni.
Oraily osy sátte «Otandastar qory» atynan jáne óz atymnan egemendi elimizdegi biregei birlik pen ultaralyq tatýlyqtyń uiytqysy bolǵan Qazaqstan halqy Assambleiasyn qurylǵanyna 26 jyl tolýymen de shyn júrekten quttyqtaimyn!
Aǵynan jarylyp, alǵys aitý - riiasyz rizalyqtyń nyshany, sondyqtan búgingi jiynda eldegi qandastar men shettegi otandastar atynan alǵys arnaýymyzǵa tolyq negiz bar dep oilaimyn.
Birinshiden, biyl - Qazaqstan Respýblikasy Táýelsizdiginiń 30 jyldyq mereitoiy. Eń aldymen aitarym:
Aq bilektiń kúshimen, aq naizanyń ushymen ulan-baitaq Uly dalamyzdy qorǵaǵan ata-babamyzdyń asyl armany bolǵan azattyqtyń aq tańyn násip etken Allaǵa sansyz shúkir, sheksiz alǵys!
Keshegi Keńester Odaǵy tarap, enshisin alǵan egemendi elimizdi Táýelsizdik táýekeline bastap, aýmaly-tókpeli kezeńde tyǵyryqtan alyp shyqqan sarabdal saiasatker Elbasymyzǵa alǵys aitamyz!
Qazaqstan Respýblikasy derbes memleket retinde óz Táýelsizdigin jariia ete sala Tuńǵysh Prezidentimiz taǵdyr taýanymen shartarapqa tarydai shashyraǵan ulty qazaqtyń bárin taily-tuiaǵymen Uly dala eline oralýǵa shaqyryp, bir shańyraq astyna birigýge úndedi.
Sol bir syndarly shaqta Elbasy «Alystaǵy aǵaiynǵa aq tilek» atty áigili hatyn jariialaǵany belgili. Qazaq kóshin jandandyrý maqsatynda «Dúniejúzi qazaqtary qaýymdastyǵy» qurylyp, eń alǵashqy quryltai 1992 jylǵy 28 qyrqúiek pen 3 qazan aralyǵynda Almaty qalasynda ótti.
Osy quryltaida sóilegen sózinde Nursultan Ábishuly: «Bul dúniede bizdiń bir ǵana Otanymyz bar, ol - táýelsiz Qazaqstan. Biz týǵan memleketimizdiń táýelsizdigin baiandy etýge, qýatyn arttyrýǵa, onyń igiligine, halyqaralyq qoǵamdastyqta abyroiynyń artýyna adal qyzmet etýge paryzdarmyz», óitkeni «Bar qazaq - bir qazaq» degen jalyndy sózin aityp, milliondaǵan eldiń et-júregin eljiretip, alashqa asqaq rýh syilaǵan edi.
Artynsha atajurtty ańsaǵan aǵaiyndar elge aǵyla bastady. Táý etken Táýelsizdik rýhymen qanattanǵan qandastardyń Uly kóshine de biyl 30 jyl tolyp otyr. Endeshe, Elbasy úndeýimen tarihi Otanymen qaita qaýyshqan qandastar qaýymy atynan barsha baýyrlardy qushaq jaia qarsy alǵan Qazaq halqyna riiasyz rizalyq bildirip, sheksiz alǵys aitqymyz keledi!
Sonymen qatar, byltyrdan beri jahandy indet jailap, adamzat ataýlyǵa qater tóngen syndardy shaqta shet elderdegi otandastardyń da qalyń eli - qazaǵyna qaiyrymdylyq jasap, janashyrlyq tanytqan jaqsylyǵyn airyqsha atap aitqan jón. Qaýip áli de seiile qoiǵan joq. Osyndai kúlliálemdik kúrdeli jaǵdaida atajurttaǵy aǵaiynynyń amandyǵyn tilep, gýmanitarlyq kómekterin joldaǵan shettegi janashyr otandastarymyzǵa da kópten kóp rahmet!
Táýelsizdikten bastaý alǵan Uly kósh áli tolastaǵan joq. Bir kezderi taǵdyr tálkegimen shekara asyp, shetelge aýǵan aǵaiyndardyń atamekenge aǵylýyna - 1997 jyldyń 13 jeltoqsanynda «Halyqtyń kóshi-qony týraly» Zańǵa Qazaqstan Respýblikasynyń Tuńǵysh Prezidenti Nursultan Ábishuly Nazarbaevtyń qol qoiýy dańǵyl jol ashyp berdi. Nátijesinde álemniń ár túkpirindegi talai qazaqtyń ata qonysqa degen saýmal saǵynyshy úzilmeitin úmitke, selkeýsiz senimge ainaldy.
Ata qonysymen qaýyshqan qandastar ózderimen birge qazaqtyń joǵalýǵa ainalǵan keibir salt-dástúrleri men ádet-ǵuryptaryn, umytyla bastaǵan kóne sózderin ala keldi desek artyq aitqandyq emes. Shetelde týyp, egemendikpen birge elimizge oralǵan talai tanymal tulǵalar qazir memleketimizdiń mereiin asyryp, qandas óner juldyzdary men sahna sańlaqtary qazaqtyń atyn aidai álemge áigilep júr. Al, isker baýyrlar men kásipker qandastar halyqqa qaltqysyz qyzmet etýde.
Endeshe, eldikti uran, tatýlyqty tý etken kópultty Qazaqstan halqyna myń alǵys!» degen aqjarma tilegimdi arnaimyn.
Maǵaýiia Sarbasov
«Otandastar qory» KeAQ
Vitse-Prezidenti
