«Nur Otan» partiiasy Qyzylorda oblystyq filialynyń uiymdastyrýymen oblystyq otbasylyq baiqaý ótti. Oǵan aýmaqtyq partiia filialdarynan 10 otbasy qatysyp baq synasty.
Sharanyń maqsaty Elbasynyń «Bolashaqqa baǵdar: rýhani jańǵyrý» baǵdarlamalyq maqalasyndaǵy otbasy qundylyqtaryn dáripteý, bastaýysh partiia uiymdaryna jan-jaqty qoldaý kórsetý.
Sharada oblystyq partiia filialy tóraǵasynyń birinshi orynbasary Ibadýlla Quttyqojaev otbasy – bizdiń qoǵamymyzdyń qundylyqtaryn saqtaýdyń asa mańyzdy institýty ekenin atap ótti.
Elbasy «Bolshaqqa baǵdar: rýhani jańǵyrý» atty baǵdarlamalyq maqalasynda ulttyq salt-dástúrlerimiz, tilimiz ben ádebietimiz, ulttyq rýhymyzdyń boiymyzda máńgi qalýǵa tiistigin atap kórsetken. Bul jahandaný dáýirinde óziniń tarihynyń, mádenieti men tiliniń qadirine jetetin halyq qana tabysty órkendei alatyndyǵynyń kepili. Sondyqtan otbasyndaǵy yntymaqty, bereke men birlikti saqtai otyryp, otbasy qundylyqtaryn nasihattaý, damytý bizdiń strategiialyq basymdyǵymyz bolyp tabylady»,-dedi Ibadýlla Quttyqojaev.
Bul baiqaýda aýmaqtyq kezeńnen ozyq shyqqan 10 otbasy qatysyp, tanystyrý, óz ónerin kórsetý sonymen qatar el, óńir tarihynan daiyndalǵan viktorinalyq suraqtarǵa jaýap berip, Elbasynyń «Bolashaqqa baǵdar: rýhani jańǵyrý» baǵdarlamalyq maqalasyn zamaný turǵyda nasihattaý boiynsha synǵa tústi.
Shara sońynda júldeli oryndar anyqtaldy. Bas júldeni Dáýrenbekovter otbasy, I oryndy Qyzylorda qalasynan Turabaevtar otbasy, II oryndy Jalaǵash aýdanynan Qaljanovtar otbasy ielense, júldeli III oryn Qazaly aýdanynan Seksenbaevtar otbasyna buiyrdy.
Qalǵan otbasylary da túrli nominatsiialarǵa ie bolyp, «Nur Otan» partiiasy oblystyq filialy men aimaqtyq «Rýhani jańǵyrý» ortalyǵynyń arnaiy alǵys hattary men estelik syilyqtary tabystaldy.
- Otan otbasynan bastalady. Úlgili otbasy keiingi urpaqqa qoljetimdi kórneki qural ispetti. Sondyqtan «Nur Otan» partiiasy uiymdastyryp otyrǵan bul baiqaý Elbasy kózdegen jańǵyrýdyń jarqyn úlgisin nasihattaýda ózgege úlgi kórsetip otyr»,- dedi bas júlde iegeri «Turan» filialyna qarasty «Aiqyn» bastaýysh partiia uiymynyń múshesi Qýanysh Dáýrenbekov.
