Osy aidyń sońynda elimizge 500 myń doza sheteldik vaktsina jetkizilmek. Bul týraly QR DSM Meditsinalyq jáne farmatsevtikalyq baqylaý komiteti Nur-Sultan qalalyq departamentiniń basshysy Nurlybek Asylbekov aitty, dep habarlaidy QazAqparat.
«Birqatar kelissóz protsesi aiaqtalýǵa jaqyn. Olardyń barlyǵy da óndirýshiler tarapynan qupiia aqparat sanalady. Sondyqtan kelisimshartqa qol qoiylǵannan keiin biz ol jaiynda aita alamyz. Sáýirde Qazaqstan Respýblikasyna sheteldik vaktsinanyń 500 myńǵa deiin dozasy jetkizýdi josparlap otyrmyz», - dedi ol Ortalyq kommýnikatsiialar qyzmetindegi baspasóz máslihaty barysynda.
Sonymen qatar ol birqatar sheteldik óndirýshini atady.
«Qazirgi ýaqytta olar - Pfizer Biotek, Johnson&Johnson jáne «Sinofarm» qytailyq vaktsinasy. Kelissóz protsesi baiaý júrip jatqan ózge de birqatar kompaniia bar. Olar óte úlken kompaniia ekendigin, sheshim jyldam qabyldanbaityndyǵyn túsiný qajet. Onyń ústine álemde vaktsina tapshylyǵy da bar», - dedi Nurlybek Asylbekov.
