Atom energiiasy jónindegi halyqaralyq agenttiktiń (MAGATE) Óskemendegi az baiytylǵan ýran bankine ýrannyń alǵashqy partiiasy jetkizildi, - dep habarlady Qazaqstannyń syrtqy ister ministrligi.
Úlbi metallýrgiialyq zaýytynda ornalasqan bankke ýran qoryn "Qazatomónerkásip" ulttyq kompaniiasy men frantsýzdyń "Orano-Tsikl" kompaniiasy jetkizip otyrmaq. Ministrlik dereginshe, bankte "atom elektr stantsiialarynda otyn óndirýge jaramdy 90 metrikalyq tonna ýran geksaftoridi" saqtalady.
SIM málimdemesinde "az baiytylǵan ýran banki qory radioaktivti qaldyq emes, halyqqa jáne qorshaǵan ortaǵa qaýip tóndirmeidi" dep jazǵan.
MAGATE men Qazaqstan úkimeti arasynda az baiytylǵan ýran qory bankin qurý týraly kelisim 2015 jyly tamyzda jasalǵan. Qazaqstan Úkimetiniń málimdeýinshe, ýran rezervi – derbes qor, ol tek álemdik ýran naryǵynda daǵdarys týǵan jaǵdaida paidalanylady. Qalypty jaǵdaida bul qordyń qajeti bolmaidy. Banktiń ashylý rásimi 2017 jyly tamyz aiynda ótken.
Osydan birneshe jyl buryn Qazaqstan aýmaǵynan iadrolyq otyn banki ashylatyny belgili bolǵan kezde qoǵamda halyqaralyq uiym jobasyna qatysty túrli pikir bolǵan. Keibir sarapshylar "Qazaqstan ýrandy óndirý, óńdeý, saqtaý tehnologiialaryn damytsa, halyqaralyq naryqta salmaǵy arta túsedi" dese, keibiri bankte apat bolǵan jaǵdaida qorshaǵan ortaǵa radiatsiia taraidy degen qaýip aitqan.
