Óskemendegi ziialy qaýym ókilderi osyndai usynys aityp, Shyǵys Qazaqstan oblysynyń ákimi Danial Ahmetovke usynys-hat jazdy. Hattyń mátinin nazarlaryńyzǵa usyna otyryp, qoldaý bildirýlerińizdi suraimyz!
«Qurmetti Danial Kenjetaiuly!
Elbasymyz Nursultan Nazarbaevtyń bastamasymen, tikelei muryndyq bolýymen qolǵa alynǵan, búgingi kúni respýblikamyzdyń túkpir-túkpirinde múmkindiginshe júzege asyrylyp jatqan «Rýhani jańǵyrý», «Uly dalanyń jeti qyry» atty jobalarǵa Siz basqaryp otyrǵan Shyǵys Qazaqstan oblysynyń súbeli úles qosyp jatqanyna únemi marqaiyp júremiz. Ásirese, álem tarihynda, onyń damý tegershiginiń únemi progrestik baǵytqa bet burýynda, jalpy adamzat damýy evoliýtsiiasynda eresen úlken ról atqarǵan Altai, ony meken etken túrkilerdiń ótkenine kári Eýropa men muhittyń arǵy betindegi Amerikanyń jiti nazar aýdarýy, tikelei Elbasy men Siz yqpal etip, jaǵdai jasaǵan ǵalym-zertteýshilerdiń arqasy. Óńirimizden tabylǵan Altyn adam, taǵy da basqa qundy jádigerler – osy sózimizdiń aiǵaqty dáleli.
Árine, kez kelgen iri tarihi qubylysty týǵyzatyn da, ony júzege asyratyn da – halyq. Naqtylap aitsaq, halyqtyń arasynan sýyrylyp shyqqan asa talantty jeke tulǵa. Al, adam faktoryn qalai qadirleý, ony madaqtaý men marapattaý, eli men jurtynyń abyroiyna abyroi, dańqyna dańq qosqan tulǵalardy máńgilik este qaldyrý máselesinde, Siz erekshe qarymdylyq baiqatyp júrsiz. Oǵan halyqtyń kózi áldeqashan jetken. Máselen, Elbasymyzdyń «Rýhani jańǵyrý» jobasyna orai, seńi máńgi buzylmai kelgen Shyǵys Qazaqstan oblysyndaǵy ábden eskirgen, tozyǵy jetken, ótken qoǵamdyq formatsiialardyń qańsyq murasy syndy jer-sý, qala-aýyl, kóshe, mektep, t.b. ataýlardyń sońǵy eki jyl ishinde asa shapshań jańǵyryp, ózderiniń burynǵy tarihi ataýlarymen qaitara tabysyp nemese el men jurttyń kókeiinde júrgen esimderge ie bolyp jatqany, osylardyń ishindegi shúidelisi - Zyriannyń Altai atalýy, Sizdiń qairatkerlik tulǵańyzdy asqaqtata túskeni ras. Ámanda tileýlespiz!
Endigi usynys-tilegimizdiń tizgini de Sizdiń qolyńyzda. 2009 jyldyń qara kúzinde qazaq óneriniń shyńyna órmelep shyǵyp, kúni bolýǵa qyzmet jasap júrgen alashtyń asa daryndy jas rejisseri Rústem Esdáýletov kenetten dúnieden ozdy. Orda buzar otyz jasynda. Ol oblys óneriniń qara shańyraǵy - oblystyq drama teatrynyń, onda buryn-sońdy bolmaǵan qazaq trýppasynyń ashylyp, órkendep damýyna eren eńbek etken azamat edi. Aldymen oblysta buryn-sońdy bolmaǵan qazaq trýppasyn ashyp, júre-bara sol teatrdyń direktory qyzmetinde júrip respýblika sahnalarynda Shyǵys Qazaqstannyń atyn, ónerpazdaryn aishyqtady. Respýblikada ulttyq turǵydan alǵanda buryn aty men zaty beimaǵulym Shyǵystyń abyroiy kóterildi. Tanymaldylyqqa ie boldy. Rústem Orazbaiuly onmen de shektelgen joq, shyǵystyń teatryn halyqaralyq deńgeige shyǵardy: oblystyq teatr artisteri óz shyǵarmashylyqtarynyń san qyrly ekendigin Resei, Qyrǵyzstan, Eýropa sahnalarynda meilinshe dáleldedi. Ol – Táýelsiz Qazaqstannyń múldem jańa formatty rejisserleriniń kóshbasshysy boldy.
Rústem Esdáýletov ári san qyrly rejisser, ári lirik aqyn, ári myqty dramatýrg, ári úlken pedagog bolatyn. Eń bastysy, ol – Adam edi. Uly Abaidyń «Adam bol!» degen basty qaǵidasyn keýdesinen shybyndai jany pyr etip ushyp ketkenshe múltiksiz oryndady. Óle-ólgenshe halqyna, óziniń týyp-ósken Shyǵysyna jankeshtilikpen eńbek etti. Sońǵy demi de teatr sahnasynda úzildi.
Qurmetti Danial Kenjetaiuly!
«Jerdiń atyn el shyǵarady, eldiń atyn er shyǵarady» deidi kemeńger halqymyz. Keshegi kúni osy týǵan Shyǵysy úshin jarǵaq qulaǵy jastyqqa timei, boiyndaǵy Allasy syilaǵan barlyq múmkindikteri men arda qasietterin eline sadaqalaǵan Rústem Esdýletovtai rejisserdiń dúnieden ótkenine 2019 jyly on jyl tolady eken. Sol ataýly jylǵa jáne keshegi kúni Elbasy shegelep aitqan Jastar jylyna orailastyryp oblystyq drama teatryna ózi ystyǵyna kúiip, sýyǵyna tońǵan, muqym sanaly ǵumyryn qazaqtyń óneri men teatryna baǵyshtaǵan Rústem Esdáýletovtyń atyn bersek degen ótinishimiz bar. Oblys biligi teatrǵa osy azamattyń atyn berý arqyly «Rýhani jańǵyrý» jobasynyń eki baby boiynsha muratqa jetedi: birinshiden – halyqtyń talap-tilegi úderisinen shyǵady; ekinshiden – jas urpaqqa óziniń shynaiy patriottaryn qurmetteýdi úiretedi! Eger de Ózińiz tarapyńyzdan bul usynys qoldaý taýyp jatsa, óńir halqynyń qýanyshpen qoldaitynyna kepilmiz».
Izgi nietpen:
Álibek Qańtarbaev:
– jazýshy, QR Jazýshylar Odaǵy ShQO filialynyń direktory;Túsiphan Túsipbekov:
– qoǵam qairatkeri, «Qazaqstandyq mádeniet, sport, týrizm jáne aqparat qyzmetkerleri salalyq kásiptik odaǵy» QB-niń ShQO filialynyń tóraǵasy;Jańabai Áshimov:
– eńbek ardageri, ShQ oblystyq Aqsaqaldar alqasynyń tóraǵasy;Serik Qusanbaev:
– aitysker aqyn, «Altai asý» qoǵamdyq birlestiginiń atqarýshy direktory, QR Mádeniet qairatkeri.
