video kadry
Apelliatsiialyq sot Óskemende qyzdy urdy dep aiyptalýshylarǵa úkimdi ózgerissiz qaldyrdy, - dep habarlaidy Tengrinews.kz saity.
Biyl naýryzda Óskemende bolǵan oqiǵa úlken qoǵamdyq rezonans týdyrdy. Oiyn-saýyq ortalyǵynda kámeletke tolmaǵan qyzdy qatigezdikpen uryp-soqqan video Jelige sáýirde ǵana shyqqan edi.
Qyzdyń ájethanada qatygezdikpen soqqyǵa jyǵylǵan sátin sol jerde bolǵan qyzdardyń biri videoǵa túsirip alǵan. Derekti Shyǵys Qazaqstan oblysynyń Politsiia departamenti rastap, tekserý júrgizilgenin habarlady, nátijesinde uryp-soǵý deregi QR QK-nyń 293-baby 2-bóligi boiynsha tirkeldi.
Zardap shekken qyz buǵan deiin birneshe ret soqqyǵa jyǵylyp, bopsalaý qurbany bolǵany birneshe aiǵa sozylǵan tergeý nátijesinde anyqtalǵan. Qyzdan videony jelige taratamyz dep qorqytyp, bopsalaý arqyly 50 myń teńge alǵan. Jábirlenýshiniń týystary QR QK-niń 293-baby, 2-bóligi boiynsha ǵana is qozǵalýyna qarsylyqtaryn bildirdi.
"Nege bilim basqarmasy bopsalaý, oǵan qosa urlyq bolǵanyn aitpaidy? Biz isti "Buzaqylyq" baby boiynsha ǵana emes, sonymen qatar "Bopsalaý" jáne "Urlyq" baptary boiynsha da júrgizýdi talap etemiz. Biz qylmyskerlerdi zań boiynsha jazalaý úshin isti sotqa jetkizgimiz keledi. Osy is boiynsha bir ǵana qyzdyń anasy ótken aida qońyraý shalyp, keshirim surady", – dedi jábirlenýshiniń ápkesi Toqjan Dosymova.
Bul is boiynsha sottalýshy úsh adam bar. Úkim shildede shyqty.
"Sot istiń mán-jaiyn jáne sottalýshylardyń jeke basyn, jábirlenýshilerdiń pikirin, quqyqqa qaishy áreketterdiń sipatyn, zalaldyń ótelmeýin eskere otyryp, A. jáne T. jazany QK-niń 293-baby 2-bóligi 1-tarmaǵy boiynsha bir jylǵa bas bostandyǵyn shekteýdi, QK-niń 194-baby 2-bóligi 1, 2-tarmaqtary boiynsha úsh jyl merzimge bas bostandyǵynan aiyrýdy taǵaiyndady. Túpkilikti sheshim jaýaptylardy úsh jylǵa bas bostandyǵynan aiyrý. O. - bir jyl bas bostandyǵyn shekteldi", - delingen sot habarlamasynda.
Is boiynsha moraldyq ziiandy óteý maqsatynda jábirlenýshiniń paidasyna 9 million teńge somasy taǵaiyndaldy.
Aita keteiik, sottalǵandardyń tarapynan ata-analary apelliatsiiaǵa ótinish berip, 14 tamyzda apelliatsiialyq sot úkimdi kúshinde qaldyrý týraly sheshim shyǵardy.
"Sot apelliatsiialyq shaǵymdy muqiiat zerttep, sottalǵandardyń kinási dáleldendi degen qorytyndyǵa keldi", - dep túsindirdi oblystyq sottyń qylmystyq ister jónindegi sot komissiiasynyń tóraǵasy Ádil Bakin.
Alaida, basqa da sumdyq málimetter bar. Jábirlenýshi qyzdyń anasy sot protsesine qatysýshylardyń biri kámeletke tolmaǵan balany qorlaý úshin kamera ornatyp, páter daiyndalǵanyn aitqan.
Sondai-aq, jábirlenýshiniń týystary men advokatynyń aitýynsha, janjaldyń basqa da, shamamen 11 qatysýshysy jazadan sytylyp shyqqan. Qyzǵa qorlyq kórsetýde olardyń da qatysy bar degen boljam bar. Olardyń arasynda kámeletke tolmaǵan balalar bar bolǵandyqtan, jaýapqa tartylmaǵan.
