Óskemen qalasynyń ákimi Jaqsylyq Omar qol astyndaǵy qyzmetkeriniń jol erejesin buzǵany úshin jazaǵa tartylǵanyn málim etti, dep habarlaidy "Ult aqparat".
«Keshe áleýmettik jelide Óskemen turǵyny jariialaǵan video tarady. Videoda qalalyq turǵyn úi-kommýnaldyq sharýashylyq bóliminiń avtokóligi Nursultan Nazarbaev dańǵylyndaǵy turǵyn úidiń aýlasyndaǵy kólikterdiń jolyn bógep turǵandyǵy kórsetilgen. Al sol kólik tizgininde atalǵan bólim basshysy Erkin Turarov boldy», - dep jazdy ákim Instagram -daǵy paraqshasynda.
Qala basshysynyń aitýynsha, TÚKSh bóliminiń basshysy kólikti aýladaǵy turaqtan shyǵaryp, politsiianyń kelýin kútti.
«Oǵan qatysty ákimshilik hattama toltyryldy. Sondai-aq bólim basshysyna jol qozǵalysy erejelerin buzbaý jáne memlekettik qyzmetshilerdiń etikasyn saqtaý qajettigi jaily túsindirildi», - deidi Jaqsylyq Omar.
