Óskemende joǵalyp ketken jasóspirim qyz aman-esen tabyldy. Politsiia men Ulttyq ulan qyzmetkerleri júrgizgen izdeý jumystary týra bir táýlikke sozyldy, dep habarlaidy "Ult aqparat".
Quqyqqorǵaýshylar men Ulttyq gvardiia qyzmetkerleri Óskemen qalasynyń 19-shy shaǵynaýdanynda izdeý jumystaryn júrgizip, jergilikti turǵyndardan surastyrǵan.
Búgin ShQO Politsiia departamentiniń baspasóz qyzmeti qyz bala din aman tabylǵanyn málim etti.
«Jasóspirimdi izdestirý jumystary sátti aiaqtaldy. Ol 8 tamyz kúni keshqurym tabyldy. Qyz balanyń ózi túsindirgendei, ol osy ýaqytqa deiin ózi turǵan úiiniń shatyrynda tyǵylyp otyrǵan. Anasymen urysyp qalǵannan keiin, úiinen ketip qalǵan. Balany meditsinalyq qyzmetkerler tekserip, ómirine eshqandai qaýiptiń týyndap turmaǵanyn anyqtady», - delingen departamenttiń habarlamasynda.
Qazirgi ýaqytta istiń mán-jaiyn Jasóspirimder isi jónindegi politsiia tekserip jatyr.
Eske sala ketsek, 7 tamyz kúni saǵat 18:30 shamasynda Óskemen qalasynyń Esenberlin kóshesi, 4 «A» mekenjaiynda turatyn, 12 jastaǵy Janerke Qanapiianova úiinen shyǵyp ketip, qaita oralmaǵany habarlanǵan bolatyn. Ony izdestirý jumystary uiymdastyrylyp, izdeý sharalaryna Óskemen qalalyq Politsiia basqarmasynyń jeke quramy men Ulttyq ulannyń 60 áskeri qyzmetkeri jumyldyryldy.
