Óskemen qalasynda joǵalyp ketken 14 jastaǵy qyz aman-esen tabyldy, dep habarlaidy "Ult aqparat".
Qalalyq Politsiia basqarmasy baspasóz qyzmetiniń málimetine súiensek, Jánerke Qanapiianova 8 tamyzda joǵalyp ketken. Úiden dúkenge shyqqan jasóspirim sol kúii qaityp oralmady.
«14 jastaǵy qyzdy izdeýge qalalyq Politsiia basqarmasynyń barlyq jeke quramy jáne 50-den astam erikti jumyldyryldy. 11 tamyz kúni Ál-Farabi dańǵylynda oinap júrgen balalar qyzdy kórip qalǵan. Olar Jánerkeni úiine ákeldi», - delingen habarlamada.
Jasóspirim tártip saqshylaryna ne sebepti úiden ketip qalǵanyn aityp bergen.
«Anam maǵan urysqan soń, oǵan renjip ketip qaldym. Qurylysy aiaqtalmaǵan ǵimaratqa baryp sonda otyrdym. Kenet ózimdi jaman sezingen soń jata turaiyn dedim. Alaida ornymnan múlde tura almai qaldym. Osylaisha, 3 kúndi sol jerde ótkizdim. Áiteýir halim jaqsarǵan boida syrtqa shyqtym. Osy kezde meni balalar kórip qaldy», - dedi ol.
