Memlekettik qyzmet isteri agenttiginiń baspasóz hatshysy Erhan Tatken «Óskemendegi sheneýnikter tóbelesine» qatysty beinematerial boiynsha agenttiktiń pozitsiiasyn jetkizdi, dep habarlaidy "Ult aqparat".
«Qazirgi ýaqytta agenttiktiń Shyǵys Qazaqstan oblysy boiynsha departamenti oryn alǵan jaǵdaiǵa memlekettik qyzmetshilerdiń qatysy bolýy nemese bolmaýyn anyqtaý maqsatynda tiisti jumystardy atqarýda. Agenttik atalǵan máseleni erekshe baqylaýǵa aldy. Tekseris nátijeleri týraly jurtshylyqqa qosymsha habarlanatyn bolady», - dedi Tatken.
Eske salaiyq, Instagram-akkaýnttardyń birinde video jariialanǵan bolatyn. Videoǵa berilgen kommentariide aitylǵandai, Óskemen meimanhanalarynyń birinde qala sheneýnikteri janjaldasyp, onyń sońynda bir adam pyshaq jaraqatyn aldy.
