Óskemende shaǵyn formatta sahnalanǵan spektaklderdiń Rústem Esdáýletov atyndaǵy II respýblikalyq teatr festivali ótedi, dep habarlaidy QazAqparat tilshisi.
Rústem Esdáýletov atyndaǵy respýblikalyq teatr festivali Óskemende 10-14 qarasha aralyǵynda uiymdastyrylǵaly otyr. Festivalge elimizdiń barlyq óńirlerindegi teatr ujymdary qatyspaq.
Aita ketsek, Rústem Esdáýletov atyndaǵy I respýblikalyq festival 2016 jyly ótken bolatyn. Jastar jáne stýdentter festivaline ol kezde Astana, Almaty, Qaraǵandy, Kókshetaý, Semei syndy qalalardan birqatar teatr ujymdary kelgen edi.
Rejisser, teatr jáne kino akteri, aqyn, dramatýrg Rústem Esdáýlet 1978 jyly týǵan. Qazaqstan oblystyq Jambyl atyndaǵy drama teatrynyń direktory ári bas rejisseri qyzmetin atqara júrip, qazaq ulttyq sahna óneriniń damýyna eleýli úles qosqan tulǵa. Jas rejisserdiń jetekshiligindegi teatr ujymy birneshe ret halyqaralyq baiqaýlardyń jeńimpazy atanǵan. Qazaq kórermeni úshin Rústem akter retinde de tanymal. «Bórinama» jyr jinaǵynyń avtory. Óleńderi «XXI ǵasyr aqyndarynyń antologiiasyna» jáne basqa da ujymdyq jinaqtarǵa engen. Memlekettik «Daryn» jastar syilyǵynyń iegeri. 2007 jyly «Sháken juldyzdary» kinofestivalinde «Bes tiyn» kórkem shyǵarmasy úshin arnaiy marapatqa ie bolǵan.
Rústem Esdáýletov qazaq trýppasyn basqarǵan jeti jyl ishinde 25 qoiylym jasap úlgergen. 2009 jyly trýppa Qaraǵandyda ótken respýblikalyq teatrlar festivalinde júldeli úshinshi oryndy ielendi. Rústemniń juldyzdy jeńisteri alda edi, ókinishke orai qazaqtyń talantty uly 2009 jyldyń 25 qarashasynda kóz jumdy.
Festivaldiń ótýine Shyǵys Qazaqstan oblysynyń Mádeniet, arhivter jáne qujattama basqarmasy men «Jastar teatry» muryndyq bolyp otyr.
