Óskemen qalasynda órt shyqqan kópqabatty úiden 30 adam, onyń ishinde 14 bala qaýipsiz jerge shyǵaryldy, dep habarlaidy QazAqparat.
ShQO Tótenshe jaǵdailar departamenti baspasóz qyzmetiniń málimetine súiensek, Kókjal Baraq kóshesindegi kópqabatty úidiń birinshi qabatyndaǵy páterde órt shyqty. Oqiǵa ornyna qutqarýshylar shuǵyl kelgende podez ishin kók tútin tumshalaǵan.
«Olar birden 30 turǵynǵa, onyń ishinde 14 balaǵa ottegi maskasyn kigizip, avtosaty arqyly qutqardy. Órtti sóndirýge 30 adam men 8 tehnika jumyldyrylǵan. Aldyn ala málimet boiynsha qyzyl jalynnyń shyǵýyna – balalardyń otpen oinaýy sebep boldy», - delingen aqparatta.
Sondai-aq Protozanov kóshesindegi kópqabatty úi turǵyndar 9-qabattaǵy páterden shyqqan tútindi baiqaǵan. Olar dereý «101» qyzmetine habarlasty. Oqiǵa ornyna kelgen órt sóndirýshiler sol páterge kirgende janyp jatqan jihazdy kórgen.
«Ishte eshkim bolmai shyqty. Qaýipsizdik maqsatynda órt sóndirýshiler alty adamdy evakýatsiialap, «Vahta» avtokóligine ornalastyrdy. Kóp uzamai jalpy aýdany 6 sharshy metrge jetken tilsiz jaý tolyqtai aýyzdyqtaldy», - delingen habarlamada.
