Jaiaý júrginshilerge arnalǵan aqyldy baǵdarshamdar qaryzy bar adamdardy, quqyq buzýshylar men izdeýdegi qylmyskerlerdi anyqtaidy, – dep habarlaidy Altainiýs tilshisi.
Óskemen kóshelerine Ishki ister ministrliginiń bazasyna qosylǵan, jaiaý júrginshilerge arnalǵan, kamerasy bar baǵdarsham ornatyldy. Politsiia basqarmasy ókilderi aqyldy baǵdarshamnyń ázirge synaq rejiminde jumys isteitinin málimdedi. Biraq quqyq qorǵaý organdary qyzmetkerleri «ǵajaiyp tehnikaǵa» úlken úmit artyp otyr.
– Adam joldan ótip bara jatqanda, kameralar onlain rejimde IIM-niń bazasymen salystyryp, onyń kim ekenin anaqtaidy. Bazada aliment tólemeitinderden bastap, izdeýdegilerge deiin barlyq qylmyskerlerdiń tizimi bolady, – dep túsindirdi Óskemen qalalyq politsiia basqarmasynyń jol-tehnikalyq inspektsiia bóliminiń basshysy Sergei Kovalenko.
Baǵdarsham arnaiy ortalyq alańǵa ornatylǵan, sebebi ol jaqtan adamdar joldan kóp ótedi. Sonymen qatar, jaqyn mańda politsiia statsionar pýnkti bar. Al aqyldy tehnika qylmyskerdi anyqtasa, bul týraly belgi dereý patrýl qyzmetkerlerine barady.
– Ázirge baǵdarsham quqyq buzýshylardy anyqtap úlgermedi, biraq bul ýaqyt máselesi. Bizdiń óńir úshin bul noýhaý. Sebebi oblys kólemindegi ózge qalalarda buǵan deiin osyndai baǵdarsham ornatyldy degendi estimedim, – deidi Kovalenko.
Aqyldy baǵdarsham kameramen ǵana jabdyqtalmaǵan. Sonymen qatar onyń qas qaraiǵanda avtomatty túrde qosylatyn úsh jaryq kózi bar. Sondyqtan ol jaiaý júrginshilerdi táýliktiń qai mezgili bolmasyn, jazbai tani alady. Iaǵni 24 saǵat úzdiksiz jumys isteidi.
