Óskemen qalasynda ashyq qudyqqa túsip ketken áiel adam tabyldy, dep habarlaidy "Ult aqparat".
Oqiǵa 12 jeltoqsanda keshki ýaqytta bolǵan. Ashyq qudyqqa túsip ketken áiel 3 saǵat boiy shyǵa almady.
«Úide otyrǵanymyzda aiqailaǵan daýysty estip qaldyq. Syrtqa shyqqanymyzda bul daýys qudyqtyń ishinen estildi. Lezde kórshime qońyraý shaldym. Ol uzyn baspaldaq ákelip áieldi syrtqa alyp shyqty», - deidi Kýznechnaia kóshesiniń turǵyny Iýliia Sheremeteva.
Al qudyqta qalyp qoiǵan turǵyn qulaǵan kezde qaltasynan telefonyn túsirip alǵanyn aitty.
«Tereń qudyqtan óz betimmen shyǵa almadym. Qansha aiqailasam da eshkim kómekke kelmedi. Sol mańaidan ótip bara jatqan kei adamdar tipti toqtamady da. Negizinen bul qudyq kóktemnen beri ashyq turǵan», - deidi ol.
Qalalyq turǵyn úi-kommýnaldyq sharýashylyq, jolaýshylar kóligi jáne avtomobil joldary bóliminiń málimetinshe, Kýznechnaia kóshesindegi liýkterdi merdiger kompaniia 2020 jyldyń jazynda ornatqan.
«Liýktiń qaqpaǵyn bireý urlap ketti. Onyń betin jabý úshin tez arada tiisti sharalar qabyldanady» dep habarlady bólim mamandary.
