ٶسكەمەن قالاسىندا اشىق قۇدىققا تٷسٸپ كەتكەن ەيەل ادام تابىلدى, دەپ حابارلايدى "ۇلت اقپارات".
وقيعا 12 جەلتوقساندا كەشكٸ ۋاقىتتا بولعان. اشىق قۇدىققا تٷسٸپ كەتكەن ەيەل 3 ساعات بويى شىعا المادى.
«ٷيدە وتىرعانىمىزدا ايقايلاعان داۋىستى ەستٸپ قالدىق. سىرتقا شىققانىمىزدا بۇل داۋىس قۇدىقتىڭ ٸشٸنەن ەستٸلدٸ. لەزدە كٶرشٸمە قوڭىراۋ شالدىم. ول ۇزىن باسپالداق ەكەلٸپ ەيەلدٸ سىرتقا الىپ شىقتى», - دەيدٸ كۋزنەچنايا كٶشەسٸنٸڭ تۇرعىنى يۋلييا شەرەمەتەۆا.
ال قۇدىقتا قالىپ قويعان تۇرعىن قۇلاعان كەزدە قالتاسىنان تەلەفونىن تٷسٸرٸپ العانىن ايتتى.
«تەرەڭ قۇدىقتان ٶز بەتٸممەن شىعا المادىم. قانشا ايقايلاسام دا ەشكٸم كٶمەككە كەلمەدٸ. سول ماڭايدان ٶتٸپ بارا جاتقان كەي ادامدار تٸپتٸ توقتامادى دا. نەگٸزٸنەن بۇل قۇدىق كٶكتەمنەن بەرٸ اشىق تۇرعان», - دەيدٸ ول.
قالالىق تۇرعىن ٷي-كوممۋنالدىق شارۋاشىلىق, جولاۋشىلار كٶلٸگٸ جەنە اۆتوموبيل جولدارى بٶلٸمٸنٸڭ مەلٸمەتٸنشە, كۋزنەچنايا كٶشەسٸندەگٸ ليۋكتەردٸ مەردٸگەر كومپانييا 2020 جىلدىڭ جازىندا ورناتقان.
«ليۋكتٸڭ قاقپاعىن بٸرەۋ ۇرلاپ كەتتٸ. ونىڭ بەتٸن جابۋ ٷشٸن تەز ارادا تيٸستٸ شارالار قابىلدانادى» دەپ حابارلادى بٶلٸم ماماندارى.
