S.Amanjolov atyndaǵy Shyǵys Qazaqstan memlekettik ýniversitetinde Arheologiia jáne Altaidyń mádeni murasy murajaiy men ýniversitettiń tarihi murajaiy ashyldy, dep habarlaidy "Ult aqparat" altaynews.kz saityna silteme jasap.
Tarih ǵylymdarynyń doktory, arheolog ǵalym Zeinolla Samashev qazaq dalasy, onyń ishinde kendi Altai óńiri ejelgi metallýrgiia men taý-ken óndirisiniń ortalyǵy bolǵanyn erekshe atap ótti. Kezinde arheolog S. Chernikov te Shyǵys Qazaqstan aimaǵyn búkil Eýraziia keńistigindegi qola quiý óneri damyǵan óńirlerdiń biri retinde sipattaǵan. Ǵalymnyń aitýynsha, murajai jádigerleriniń deni Shyǵys Qazaqstan memlekettik ýniversitetiniń stýdentteri osy óńirde júrgizgen arheologiialyq qazba jumystary kezinde tabylǵan.
«Osy jerden tabylǵan qalaiy rýdasy sonaý qos ózen boiynan Mesopotamiiaǵa deiin taraǵan. Qola dáýirindegi mádeniettiń jurnaqtary, zattardyń bári Ońtústik Sibirge tarap otyrǵan», - dedi ol.
Elbasynyń «Uly dalanyń jeti qyry» maqalasy aiasynda murajaidy ashý josparynyń ózektiligi arta túsip, bir jyldan astam ýaqyt daiyndyqtan keiin onyń esigi aiqara ashyldy. Prezident óz maqalasynda tarihymyz ben mádenietimizge qatysty jeti baǵytty anyqtap, jumys isteýdi tapsyrdy. Sonyń biri - qola dáýirindegi qazaq halqynyń ejelgi metallýrgiiasy men óneriniń damýyna bailanysty. Sondai-aq ań stili, jylqyny qolǵa úiretý, altyn adamǵa bailanysty barlyq jádigerlerdi jinastyryp, mýzei ashý tapsyrmasy berildi.
«Áriptesterimniń óziniń týǵan ólkesiniń tarihyna úlken mán berýi erekshe qýanyshqa bólep otyr. Murajai ázirge kishkentai bolǵanymen, óte jinaqy, munda arheologiianyń barlyq kezeńderi qamtylǵan», - dedi Astanadaǵy Ulttyq murajaidyń direktory Jáken Taimaǵambetov.
Murajai qoryn únemi tolyqtyryp otyrý kózdelgen.
