Óskemendik skýlptordyń uly ákesinen qalǵan Abaidyń biýstin saýdaǵa shyǵardy, dep habarlaidy QazAqparat tilshisi.
Tanymal saýda saityna shyqqan habarlandyrýda Mihaelistiń keýdeden joǵary kesilgen músini, sondai-aq Abaidyń biýsti de bar.
Sait qoldanýshylary músinniń osydan 4 jyl buryn Mihaelis kóshesi men Abai dańǵylynyń qiylysynda turǵan eskertkishtiń bólshegi ekenin birden tanydy.
Habarlandyrýdyń iesi atyshýly músindi jasaǵan skýlptor Vladimir Samoilovtyń uly bolyp shyqty. Eskertkish avtorynyń ózi 2 jyl buryn ómirden ótse kerek.
«Áýeli oblystyq mádeniet basqarmasynyń tapsyrysy boiynsha Abai men Mihaelistiń eskertkish kompozitsiiasyn jasadyq. Ol elge unamai qalyp, súrilgen bolatyn. Ákimdik jumystyń shyǵynyn qaitarmady. Óitkeni, eki arada jazbasha kelisim bolmaǵan. Odan keiin Shemonaiha aýdanynyń ákimidigi Abai men Grebenshikovtyń músinine tapsyrys bergen. Ol da aiaqsyz qalyp, ákemniń eńbegi esh ketti», - deidi Vladimir Samoilov.
Skýlptordyń uly Abaidyń keýdeden kesilgen músinin 300 myń teńgege baǵalap otyr. Aitýynsha, qaladaǵy mýzeilerdiń biri habarlasyp, ony satyp alatyndaryn aitqan eken.
«Abaidyń músinin jasaǵany úshin Shemonaiha ákimdigi ákeme 500 myń teńge berýi tiis bolǵan. Ol shart sońyna deiin jetpedi. Endi men Abaidyń biýstin 300 myń teńgege satýǵa májbúrmin. Qandai mýzei ekeni naqty esimde joq, juma kúni habarlasyp, oblystyq sýretshiler odaǵynan qońyraý kútińiz degen. Sony kútip júrmin» - deidi ol.
Al Qazaqstan Sýretshiler odaǵynyń jergilikti filialy eshqandai músin satyp almaityndaryn aitty.
«Músinniń satylatynyn estigenbiz. Maǵan mýzeiden emes, jeke tulǵa habarlasty. Óner janashyry retinde Abaidyń músinin satyp alǵysy keletinin aityp, aqyl-keńes suraǵan» - deidi filial direktory Iana Ageikina.
