Óskemen qalalyq ákimdiginde qala kósheleriniń ataýyn ózgertý boiynsha qoǵamdyq tyńdaý ótti, dep habarlaidy "Ult aqparat".
Kún tártibine oblys ortalyǵyndaǵy 12 kósheniń atyn aýystyrý týraly másele qoiyldy. Oktiabr kóshesine Muhametjan Tynyshpaevtyń, Krýpskaia kóshesine Evgenii Brýsilovskiidiń, Revoliýtsionnaia kóshesine Qalihan Ysqaqtyń, Sovetskaia kóshelerine Adolf Ianýshkevich pen Aleksandr Zataevichtiń, Dzerjinskii kóshesine Ámire Qashaýbaevtyń, Kirov kóshesine Anton Chehovtyń, Ordjonikidze kóshesine Saǵadat Nurmaǵambetovtiń, Kýibyshev kóshesine Naryn ataýyn, Kalinin kóshesine Shyńǵystaý ataýyn berý týraly usynysty qalalyq máslihat depýtattary biraýyzdan qoldap, respýblikalyq onomastikalyq komissiianyń qaraýyna jiberdi.
Ataýy ózgergen kóshelerdiń ishinde keńestik kezeńnen qalǵan eski ataýlarmen qosa táýelsizdik jyldarynda qaita atalǵan kósheler de bar. Qalada ekinshi dúniejúzilik soǵys batyry Izǵutty Aityqovtyń atynda eki birdei kóshe bar ekeni aitylyp, onyń birine Asar degen qazaqtyń kieli ataýy berildi. Al 2002 jyly ataýy ózgergen Golovkov kóshesi araǵa 16 jyl salyp Beibitshilik degen ataýǵa ie boldy.
«2002 jyly Óskemenniń ideologiiasynda keshirilmes qatelik ketken bolatyn. Elimiz táýelsizdigin jariialap, memlekettiń irgesin qalap jatqan kezde Shyǵys Qazaqstannyń bir bóligin Reseige qosyp berý týraly usynys aityp, halyqtyń berekesin buzǵan adamnyń biri osy Golovkov bolatyn. Keiin Parlament tórinde otyryp, qazaq tiline memlekettik til statýsyn berýge qarsylyq tanytqan. Eldiń arasyna iritki salǵan adamnyń atyndaǵy kóshege Beibitshilik ataýynyń berilýin ádildiktiń ornaýy dep túsiný kerek» - deidi «Altai asýy» qoǵamdyq birlestiginiń teń tóraǵasy Túsiphan Túsipbekov.
