Ortalyq sailaý komissiiasy sailaýda Qazaqstan halqy Assambleiasy atynan depýtattyqqa úmitkerlerdiń biýdjet esebinen jabylatyn shyǵyndaryn bekitti, dep habarlaidy QazAqparat.
«Sailaý zańnamasyna sáikes, memleket kandidattarǵa óz baǵdarlamalarymen BAQ-qa shyǵý úshin qarajattyń teń bólinýine kepildik beredi. Úmitkerlerdiń buqaralyq aqparat quraldaryna shyǵýy úshin qarajat bólý tártibi men kólemin Ortalyq sailaý komissiiasy aiqyndaidy. Qaýlyǵa sáikes, BAQ-ta óz baǵdarlamalarymen sóz sóileý úshin úmitkerge qarajat bólý kózdelgen. Qarajat myna maqsatta bólinedi: teledidarda - 15 minýt, radioda-10 minýt, merzimdi baspasóz basylymdarynda nemese jelilik basylymdarda eki maqala jariialaý úshin - 0,1 baspa paraǵynan artyq bolmaýy kerek», - dedi búgingi otyrysta Ortalyq sailaý komissiiasynyń hatshysy Sabila Mustafina.
Onyń aitýynsha, sailaý týraly konstitýtsiialyq zańǵa sáikes, respýblikalyq biýdjet qarajatynan kandidattardyń sailaý aldyndaǵy jariia is-sharalardy ótkizýge, úgit materialdaryn shyǵarýǵa arnalǵan shyǵyndary, Ortalyq sailaý komissiiasy belgileitin mólsherde kólik shyǵyndary óteledi.
«Ortsailaýkom músheleri QHA músheleri daýys beretin Májilis sailaýynda respýblikalyq biýdjet qarajatynan óteletin kandidattardyń shyǵyndar mólsherin belgileý týraly qaýly qabyldady. Qaýlyda kandidattyń 870 000 teńge kóleminde, onyń ishinde: teledidar men radioda baǵdarlamalarmen sóz sóileýge, sondai-aq merzimdi baspa basylymdarynda 2 maqala jariialaýǵa - 590 000 teńge somasynda, sailaý aldyndaǵy jariia is-sharalardy ótkizýge jáne úgit materialdaryn shyǵarýǵa - 130 000 teńge somasynda, kólik shyǵystaryna - 150 000 teńge somasynda shyǵyndar belgilengen», - dedi ol.
