Reseilik oppozitsioner Aleksei Navalnyi 24 jeltoqsan kúni keshke óz shtabyndaǵy jaqtastarymen birge qujattaryn alyp Ortalyq sailaý komissiiasyna (OSK) bardy, dep habarlaidy "Ult aqparat" Azattyqqa silteme jasap.
OSK ǵimaratyna kirer aldynda ol «Bizdi sailaýǵa tirkemei qoiý múmkin emes, bizsiz ótken sailaý – sailaý emes» dep málimdedi. Kandidattar sanynyń kóptigine bailanysty OSK jeksenbidegi jumys ýaqytyn uzartty.
Navalnyi qujatyn tapsyrǵan soń ózin kandidat retinde tirkeidi degen senimde ekenin málimdedi. OSK qyzmetkerleri oǵan tirkeletini, ia tirkelmeitini týraly jańa jylǵa deiin habarlaitynyn aitty.
24 jeltoqsanda Navalnyidy Reseidiń birneshe qalasyndaǵy, onyń ishinde Máskeý men Sankt-Peterbýrgtegi bastamashyl top prezidenttikke kandidat etip usynǵan. Navalnyi jýrnalister suraǵyna jaýap berip turyp, eger ózin sailaýǵa tirkemese, onda bir jyl boiy úgit-nasihat kampaniiasyn júrgizgen barlyq kúsh sailaýǵa boikot jariialaýǵa jumys isteitinin málimdedi.
Oppozitsioner Aleksei Navalnyi 24 jeltoqsanda Máskeýde ózin qoldaǵan sailaýshylardyń jiynynda sóilep turyp sailaýda jeńiske jetýge, bilikti aýystyrýǵa jáne jańa úkimet qurýǵa kúsh salatynyn aitty.
Navalnyi sailaýshylarǵa 2018 jyly naýryzda ótetin sailaýda prezident Vladimir Pýtin jeńse, memleket «taǵy alty jylyn bosqa joǵaltatynyn» eskertti. Navalnyi «Vladimir Pýtin, siz elimizdi ózińizdi, otbasyńyz ben serikterińizdi baiytýdyń kózine ainaldyrdyńyz» dep málimdedi.
