sýret ashyq derekkózden alyndy
Ortalyq sailaý komissiiasynyń múshesi Konstantin Petrov jekelegen kandidattardyń óz múddesin kózdeýi týraly aitty, - dep habarlaidy Tengrinews.kz.
"Áleýmettik jelide birqatar kandidattar óz jaqtastaryna "sailaýshylar tiziminde turǵan jerińizden esepten shyǵarý kýáligin alyp, basqa okrýgte esepten shyǵarý kýáligimen maǵan kelip daýys berińiz" dep úndeý jasap jatyr.
Jalpy, bul múmkin emes ekenin aitqym keledi. "Sailaý týraly" Zańnyń 41-baby 6-tarmaǵynyń 1-eskertýinde basqa sailaý okrýgi boiynsha daýys berýge niet bildirgenderge esepten shyǵarý kýáligi berilmeitini arnaiy kórsetilgen. Iaǵni, tirkelgen jáne sailaýshylar tizimine engizilgen sailaý okrýgi boiynsha ǵana daýys bere alasyz. Eger siz (esepten shyǵarý kýáligi – esk.) alsańyz da, salystyrmaly túrde aitqanda, Túrkistan oblysynda osy kýálik jaramdy bolatyn sailaý okrýgi sheńberinde daýys bere alasyz. Basqa oblysqa baryp, onymen daýys bere almaisyń", - dedi Petrov.
Ortalyq sailaý komissiiasynyń tóraǵasy Nurlan Ábdirov óz kezeginde osy senbi, 18 naýryzda saǵat 18:00-de qazaqstandyq sailaýshylarǵa esepten shyǵarý kýáligin alý merzimi aiaqtalatynyn eske saldy.
Eske salaiyq, QR Parlamenti Májilisi depýtattarynyń kezekten tys sailaýy 2023 jyldyń 19 naýryzynda ótedi. Májilis sailaýymen birge barlyq deńgeidegi máslihattar depýtattarynyń sailaýy ótedi.
