Qazaqtyń alǵashqy astanasy Orynbor qalasynda qazaq tiline degen suranys qaita artyp keledi. Ana tilimizdi tek jergilikti qazaqtar ǵana emes, sondai-aq, orynborlyq orys jastary da meńgerip jatyr. Bul týraly Informburo.kz portaly málimdedi.
29 jastaǵy Anastasiia Polkýnovanyń ulty orys. Onyń qazaq tiline degen qyzyǵýshylyǵy biraz ýaqyt buryn oianǵan. Alaida, ony úirenýge jarty jyldan beri bel sheshe kirisipti. Nastianyń ata-anasy buryn Qazaqstanda turyp, sekseninshi jyldardyń ortasynda Orynborǵa kóship ketken eken. Anastasiia qazirgi Resei qalasynda týylǵan.
"Biz úide únemi shaiǵa sút qatyp ishetin edik, dastarhannan talqan úzilmeitin. Tek nan jappadyq. Onyń ústine, ata-anam qazaqsha sózderdi jii qoldanatyn. Qyzyǵýshylyǵym sol erte kezden bastalǵan, qazir úirenip júrmin. Qazaq tilinde birneshe óleńdi jatqa bilemin. Anam qazaq tilin úirenip júrgenimdi bilgende, "ony qaitesiń?" dep surady. Men jai qyzyqqanymdy aittym. Mine, qazir top bolyp "Kelinka Sabina" filmin kórip bittik. Aldymen qazaqsha sózderdiń aitylýy qiyn bolyp kóringen, keiin ózimiz sóilem qurai bastadyq", - deidi Anastasiia Polkýnova.
Al, Vasilii Demeýof bolsa qazaq tilin ózge maqsatta úirenip júr.
"Til úirenýge meni qaiǵyly jait itermeledi, naqtysyn aitsam - ákemniń ólimi. Ony máńgi esimde saqtaý úshin til úirenýim kerek boldy. Osylaisha, ákem maǵan jaqynyraq bola túsetindei. Onyń ústine, qazir til kýrsynda óte jaqsy adamdarmen tanystym, sondyqtan, qazaq tiline ýaqytymdy arnaǵanyma esh ókinbeimin", - deidi Vasilii.
Ortalyq qyzmetkerleriniń aitýynsha, til úirenýge tek jastar ǵana emes, jastary 60-tan asqan úlken kisiler de keledi eken. Olardyń ana tilin úirenýge degen qushtarlyǵy zor. Qartaiǵanda nemerelerine "Kolobok" týraly ertegini emes, qazaqtyń ulttyq ertegilerin aitqysy keletin bolar deidi til úiretýshi mamandar.
Qazaq tiline degen suranys kúrt óskennen soń Orynbordaǵy qazaq diasporasy kórshi jatqan Aqtóbe oblysynyń basshylarynan kómek surapty. Aqtóbelik bilik ókilderi de muny qýana qarsy alyp, Orynborǵa mamandar jibergen. 21 mamyrda sol mamandardyń qatysýymen úlken seminar bolyp ótti.
