Sailaý kúni buzýshylyqtardyń kóbi áleýmettik jelilerde jalǵan aqparattardyń taralýyna qatysty boldy. Bul týraly Sailaýdy Beipartiialyq baiqaý ortalyǵynda ótken brifingte QR Kásipodaqtar federatsiiasy tóraǵasynyń orynbasary Nurlan Óteshov aitty, dep habarlaidy QazAqparat.
«Keshe ótken sailaýǵa QR Kásipodaqtar federatsiiasy tarapynan da 7 myńnan astam baiqaýshy qatysty. Osy beipartiialyq baiqaý ortalyǵyndaǵy baiqaýshylardyń jumysyna úles qosyp, saraptamalyq jumysty bastap kettik. Biz de ózimizdiń esebimizdi daiyndaimyz. Biz QR Kásipodaqtar federatsiiasy tarapynan shyqqan baiqaýshylarǵa, sailaý protsesine úles qosqan azamattarǵa shynaiy alǵysymyzdy bildirgimiz keledi. Bizdiń oiymyzsha, sailaý zań sheńberinde ótti. Keshe sailaý kezinde azamattarymyz quqyqtyq mádeniti joǵary ekenin kórsetti. Sailaý komissiiasy da, baiqaýshylar da, sailaýshylar da óz jumystaryna asa jaýapkershilikpen qarady», - deidi Nurlan Óteshov.
Ol keshe ótken sailaýǵa qatysty áleýmettik jelilerde qandai jalǵan aqparattar taratylǵany týraly aitty.
«Buzýshylyqtardyń kóbi áleýmettik jelilerde jalǵan aqparattardyń taralýyna qatysty boldy. Keshe áleýmettik jelilerde júzdegen jalǵan aqparat tarady. Olardyń qaidan, qalai, ne úshin shyqqany týraly taldaý jasap jatyrmyz. Jalǵan aqparattar azamattardyń ózderiniń quqyqtaryn bilmegennen jasalyp jatqan bolýy múmin. Mysaly, buryn bolǵan nemese bizdiń elde bolmaǵan ártúrli oqiǵalardy keshe ǵana jáne bizdiń elde bolyp jatqandai etip shyǵarǵan. Sonymen qatar, býlling te oryn aldy. Iaǵni, sailaý ýchaskesindegi keibir baiqaýshyǵa kedergi jasap, orynsyz suraq qoiyp, beinejazbaǵa túsirip, olardyń ruqsatynsyz áleýmettik jelige salǵan jaǵdailar kezdesti. Bul solai áreket jasaǵan azamattardyń quqyqtyq mádenieti tómen ekenin dáleldeidi. Bizdiń tarapymyzdan buzýshylyqtar asa qatty baiqalǵan joq. Buzýshylyqtardyń 99%-y sailaý protsesine keri áserin tigizbeitin, tez arada sheshimin tabýǵa bolatyn qatelikter boldy. Mysaly, bir otbasy daýys beretin kabinkaǵa birge kirip ketken. Bul da buzýshylyqqa jatady, biraq ol daýys berý nátijesine aitarlyqtai áser etpeidi», - deidi ol.
