Búgin QR Premer-Ministri Baqytjan Saǵyntaevtyń tóraǵalyǵymen ótken Úkimet otyrysynda turǵyn úi sektorynda órtterdiń aldyn alý máselesi qaraldy. Ishki ister ministri Q. Qasymov memlekettik órtke qarsy qyzmet jáne jergilikti atqarýshy organdar órtke qarsy sharalar qabyldap jatqanyn aitty. Degenmen, elimizde jyl saiyn órt faktileri tirkelýde.
«Ótken jyly órtte qaza bolǵandardyń sany Atyraý oblysynda 2 esege, Almaty qalasynda, Shyǵys Qazaqstan jáne Pavlodar oblystarynda 25%-ǵa, Jambyl oblysynda 8%-ǵa kóbeigen. Bul rette órttiń 60%-dan astamy turǵyn úi sektorynda oryn alǵan, onyń ishinde 40%-y – turǵyndardyń otpen abaisyz bolýynan, 20%-y – peshterdi paidalaný kezinde órt qaýipsizdigi qaǵidalarynyń buzylýynan jáne 16%-y – elektr jabdyǵynan týyndaǵan», — dedi ministr Q. Qasymov.
Qysqy kezeńge daiyndyq aiasynda ótken jyldyń qyrkúiek jáne jeltoqsan ailarynda órt qaýipsizdigi ailyqtary aldyn ala ótkizildi. Jylý berý maýsymy bastalǵannan beri órt sanynyń 2%-ǵa, adam ólimi jaǵdailary 27%-ǵa tómendegeni baiqaldy.
Budan ózge, vedomstvo turǵyn úi sektorynda órtterdiń aldyn-alý is-sharalaryn júzege asyryp jatyr.
«Atalǵan jumysty úilestirý úshin barlyq óńirlerde, sondai-aq Tótenshe jaǵdailar komitetinde 6 aqpanda shtabtar quryldy. Taldaý jasalyp, órtke qarsy qyzmettiń nazaryn aýdarýdy qajet etetin birshama eldi mekenderdiń problemaly kósheleri, oramdary, aýdandary anyqtaldy. Demalys kúnderi azamattardyń kópshiliginiń úiinde bolatynyn eskerip, basqarý apparattaryn qosa alǵanda, TJK bólimsheleriniń barlyq jeke quramy órt qaýipsizdigi sharalary týraly túsindirý jumystaryn júrgizý úshin aýla aralaýǵa shyǵýda», — dedi Q. Qasymov.
Bul jumysqa jeke órtke qarsy qyzmetterdiń, órt qaýipsizdigi salasynda qyzmet kórsetýmen ailanysatyn uiymdardyń jumyskerleri jáne eriktiler jumyldyrylǵan.
«Tek ótken demalys kúnderi 107 myńdai jeke turǵyn úide profilaktikalyq jumys júrgizildi (onyń ishinde 7,6 myńy ýaqytsha qurylystar), 49 myńnan astam buzýshylyq anyqtaldy. Bul rette, 13 myńnan astam jeke turǵyn úidiń turǵyndary peshti tekserýden bas tartty», — dedi ishki ister ministri.
Órtke qarsy tehnikany qoldanýmen qosymsha jeke turǵyn úi sektorynda ótý joldary men órt gidranttarynyń jai-kúii tekserilýde.
Mektepter, aýrýhanalar, balabaqshalar, iri saýda ortalyqtary, tirshilikti qamtamasyz etý obektileri jáne kúsh qurylymdary jatatyn órt qaýpi joǵary deńgeidegi obektilerdiń jaǵdaiy turaqty baqylaýǵa alynǵan.
«Shtattyq sany 933 inspektordy quraityn memlekettik órtke qarsy baqylaý ótken jyly 40 myńnan astam nysandy tekserdi, 139 myń buzýshylyq anyqtaldy, 21 myń laýazymdy tulǵa ákimshilik jaýapkershilikke tartyldy. Sotqa órt baqylaý uiǵarymyn oryndamaityn obektilerdiń jumysyn toqtatýǵa 2 myńnan astam talap aryz jiberildi. Sonyń nátijesinde, 1 244 saýda obektisinen 1060 iri saýda ortalyǵy nemese 74% buzýshylyqtardy tolyǵymen joidy. 138 obekt boiynsha TJD talap-aryzdaryna sáikes olardy toqtata turý úshin sot rásimderi júrgizilip jatyr», — dedi Q. Qasymov.
Budan ózge, ótken jyldyń shilde aiynda adamdar jappai baratyn obektilerdiń qaýipsizdigin arttyrý úshin Ishki ister, Ulttyq ekonomika, Qarjy, Indýstriia jáne infraqurylymdyq damý ministrlikteriniń jáne Ulttyq banktiń birlesken buiryǵymen tiisti Jol kartasy bekitildi.
Osy qujat aiasynda sáýlet jáne qurylys salasyndaǵy memlekettik normativterge adamdar jappai baratyn obektilerge órt qaýipsizdigi talaptaryn qatańdatý turǵysynan 89 ózgeris pen tolyqtyrýlar engizildi.
