Shyǵys Aýstraliiada kópten kútken jańbyr jaýdy. Bilik ókilderiniń aitýynsha, bul jańbyr 28 adam men milliardqa jýyq janýar túrleriniń ómirin qiǵan orman órtin toqtatýǵa, tym bolmaǵanda baqylaýǵa alýǵa kómektesedi, dep habarlaidy Euronews.com.
Tilsiz jaýdyń beleń alýyna uzaqqa sozylǵan qurǵaqshylyq sebep boldy. Klimatologtar ony jahandyq jylynýmen bailanystyrady. Aýstraliiadaǵy orman órti qyrkúiek aiynan beri toqtamai jatyr. Jeltoqsanda eldegi ortasha temperatýra 42 Tselsii gradýsqa jýyqtady. Qyzyl jalyn 2000 úi men 10 mln gektar ormandy joidy. Bul Portýgaliia jáne Ońtústik Koreia sekildi elderdiń jalpy aýmaǵynan da kóp. Qazirgi ýaqytta surapyl órt Jańa Ońtústik Ýels ońtústik-shyǵys shtatynda jalǵasyp jatyr.
Qańtardaǵy jańbyr aýany tútinnen tazartyp Melbýrn turǵyndarynyń keń tynystaýyna múmkindik berdi. Sinoptikterdiń boljaýynsha, Jańa Ońtústik Ýelstegi jaýyn –shashyn aptanyń sońyna deiin jalǵasady.
