Aqpannyń 7-si kúni Jambyl oblysy Qordai aýdany Masanchi aýylynda turǵyndar arasynda janjal boldy. Janjaldyń neden shyqqany ázirge belgisiz. Bilik adam shyǵyny bolǵanyn aitty. Politsiia "Buzaqylyq" baby boiynsha sotqa deiingi tergeý amaldaryn júrgize bastady.
8 aqpanǵa qaraǵan túni politsiia janjal bolǵan aýmaqty qorshap, ol jaqqa eshkimdi ótkizbedi.
Tańerteń Masanchi aýylyna zorǵa jetken Azattyq tilshileri aýylda órtengen úilerdiń kóp ekenin kórdi: dámhana, dúken, kólik jýatyn oryn. Keibir ǵimarattyń tóbesi de joq.
Turǵyndardyń aitýynsha, ortalyq jaqta órtengen úiler munan da kóp. Aýyl ishinde tútinge qaqalasyń.
Munda politsiia qyzmetkerleri, tótenshe jaǵdai departament mamandary, órt sóndirýshiler júrdi.
Turǵyndardyń aitýynsha, Masanchiden bólek Qarakemer aýylynda da órt bolǵan.
8 aqpanda tańerteń málimdeme jasaǵan Prezident Qasym-Jomart Toqaev janjal kezinde adam shyǵyny bolǵanyn aitty. Oqiǵa sebepterin anyqtaý úshin úkimet komissiiasy qurylǵan.
Qordai aýdandyq ortalyq aýrýhanasy dárigerleriniń sózine súiengen Vlast.kz saitynyń jazýynsha, janjaldan kóp adam zardap shekken. Dárigerler olardyń sanyn aitpaǵan.
SENBIGE QARAǴAN TÚN
Azattyq tilshileriniń aitýynsha, Batys Qytai - Batys Eýropa avtobanynan Qordaiǵa burylǵannan keiin aýylǵa aparatyn jolda tańǵy 4 shamasynda 40-50-ge jýyq adam jinalyp, Masanchi aýylyna ótpek boldy. Olardyń basym bóligi jastar, aralarynda eresekter de bolǵan. Olardyń ashýly ekeni baiqaldy. Biraq olardy arnaiy jasaq jibermedi. Keiinnen olar úilerine qaitty. Qarasý kedeninen ótkennen keiin tilshiler janjal bolǵan aýylǵa aparatyn joldy betperde kigen, qalqandary bar omon jaýyp tastaǵanyn da kórgen.
WhatsApp messenjerinde "Qordaida túsirilgen videolar" dep taraǵan kadrlarda órtengen ǵimarat, jaryǵy synǵan kólikter, politsiia kólikteri baiqalady.
Jambyl oblystyq politsiia departamenti jurtty "tek resmi aqparatqa senýge, jelide taraǵan aqparattarǵa senbeýge shaqyryp, jalǵan aqparat taratqandar jaýapqa tartylatynyn" eskertti.
Qazaqstan Prezidenti Qasym-Jomart Toqaev Jambyl oblysy Qordai aýdanynda bolǵan turǵyndar arasyndaǵy janjalǵa qatysty Twitter jelisinde pikir bildirip, “tóbelesti arandatýshylar óz paidasyna qoldanbaq bolǵan” dedi.
