QR Ortalyq sailaý komissiiasy aldaǵy sailaý naýqanyna qatysty ótinishtermen tiimdi jumysty jolǵa qoiǵan. Mundai pikirdi Eýraziialyq integratsiia institýtynyń sarapshysy Qazybek Maigeldinov bildirdi, dep habarlaidy QazAqparat.
«Sailaýaldy naýqan qarqyn alyp kele jatyr. Bul rette halyqtyń azamattyq belsendiligimen qatar, partiialardyń belsendiligi de arta túsýde. Degenmen, qoǵam úshin óziniń saiasi mádenietin kóterý mańyzdy. Ol úshin ókiletti organdar keń buqara arasynda azamattyq, quqyqtyq aǵartýshylyq úshin túsindirý jumystaryn sapaly ári ret-retimen júrgizýi tiis», - dedi sarapshy.
Osy rette ol keshe Ortalyq sailaý komissiiasy otyrysyn ótkizip, óziniń ókilettigine qatysty túsindirme bergenin aitady. Máselen, sailaý jariialanǵan kún – 21 qazannan bastap búginge deiin Ortalyq sailaý komissiiasyna 34 ótinish kelip tústi. Beseýi – jeke tulǵalardan, 29 – zańdy tulǵalardan, onyń ishinde 13 – BAQ-tan. Kóteriletin máselelerdiń sipaty boiynsha ótinishterdi bylaisha bólýge bolady: 50 paiyzy, iaǵni 17 ótinish «Sailaý týraly» Zańnyń normalaryn túsindirý týraly, 17 paiyzy – sailaý protsesin uiymdastyrý máseleleri boiynsha aqparat berý, 12 paiyzy – sailaý zańnamasyn jáne OSK qyzmetin jetildirý jónindegi usynystar, 21 paiyzy – ózge de máseleler boiynsha.
Kórsetilgen kezeń ishinde kelip túsken 34 ótinishtiń ishinen OSK apparaty tarapynan 22-sine belgilengen merzimde ótinish berýshilerge tolyq jaýap berildi. 4-eýi Ortalyq sailaý komissiiasynyń quzyretine kirmeitindikten, zańda belgilengen tártippen memlekettik organdarǵa qaita joldandy. Qaita jasalǵan bir ótinish qaraýsyz qaldyryldy. BAQ-tyń eki aqparattyq habarlamasy OSK saitynda ornalastyryldy. 5 ótinish qaralýda. Oryndalmaǵan ótinishter joq.
«Der ýaqytynda aqparattandyrýdyń mundai úrdisin halyqtyń, sonymen qatar saiasi partiialardyń tarapynan saýal retinde qabyldap, turaqty monitoring rejimin qoldana otyryp jalǵastyrý qajet. Sońynda aqparattyq qysym men qandai da bir jaǵdaidy qiys túsindirýler oryn almaidy. Al ondai jaǵdailar sailaý jaqyndaǵan saiyn az bolmaityndyǵy túsinikti», - dedi Qazybek Maigeldinov.
