QR Úkimetindegi baspasóz konferentsiiasynda saýda jáne integratsiia ministri Baqyt Sultanov Qazaqstan Reseige ári qarai taýarlardy eksporttaý úshin Ortalyq Aziiadaǵy kórshilerimen birge taratý ortalyqtary negizinde taýar óndirýshilerdiń biryńǵai pýlyn qurýdy josparlap otyrǵanyn aitty, dep habarlaidy "Ult aqparat".
B. Sultanov atap ótkendei, azyq-túlik baǵasynyń ósý qaýpin azaitý maqsatynda basqa eldermen taýarlar qozǵalysyndaǵy kedergilerdi azaitý jáne sol arqyly saýdaǵa járdemdesý máseleleri boiynsha ekijaqty ózara is-qimyl jumystary júrgiziletin bolady. Ministr tutynýshylar úshin taýarlardyń túpkilikti qunyna tasymaldaý shyǵyndary da áser etetindigin atap ótti.
«Biz, mysaly, qyzyl shie týraly onyń Qazaqstannyń ońtústiginen jáne Ortalyq Aziia elderinen keletinin aitamyz. Bul jerde shekarada kóptegen máseleler týyndaidy. 150-200 kólik shekarada turatynyn bilesiz. Máselen, júzim salynǵan tońazytqysh kameralar kele jatqanda, jáne keden qyzmetkerleri ony ashqanda, otteginiń enýiniń ózi 20% joǵaltady deiik. Oǵan qosa, ol (óndirýshi) Nur-Sultan qalasynyń naryǵyna kelip, distribiýtordy nemese satyp alýshyny tabýǵa tyrysady, osy aralyqta taǵy 20% joǵalady. Jelilerdiń jetilmegendigi – taǵy 20%. Júzim sońǵy tutynýshyǵa jetkenshe, ol bosap qalady», — dedi ministr.
Qazirgi ýaqytta jańa Ministrlik óndirýshilerdiń naqty pýlyn qurý maqsatynda Ortalyq Aziiadaǵy áriptesterimen kelissózder júrgizip jatyr. B. Sultanovtyń aitýynsha, munda qazaqstandyq óndirýshiler de, kórshilerimiz de paida kóredi.
«Sondyqtan shekaradaǵy barlyq kedergilerdi alyp tastaýǵa múmkindik beretin biryńǵai distribýtsiia júiesi qurylady. Biryńǵai júieniń arqasynda biz baǵa turaqtylyǵyn jáne Qazaqstan naryǵyna ónimdi sapaly jetkizýdi qamtamasyz ete alamyz. Osylaisha, biz baǵanyń uzaq merzimdi aýytqýyn azaitamyz», — dedi B. Sultanov.
Sonymen qatar, ol uzaq merzimdi sipattaǵy sharalar týraly aitty. Buǵan saýda jelileri úshin kóterme-taratý saýda ortalyqtaryn qurý jatady.
«Kóterme-taratý satý ortalyqtary týraly aitatyn bolsaq, bul jetispeitin infraqurylym elementteriniń biri. Olar ónimdi jetkizý logistikasyn, olardy saqtaý jáne úi mańyndaǵy dúkenderge taratý sharalaryn pysyqtaý úshin qajet. Bizde bul jaǵy retke keltirilmegen, búginde bári distribiýtorlarǵa bailanystyrylǵan. Distribiýtor bir jerden satyp alady, ózi ákeledi jáne taratady, olar baǵany bizdiń jelilerimizge jáne dúkenderge belgileidi jáne bir-birimen básekelespeidi. Sondyqtan biz aiqyn júieni qurǵymyz keledi», — dedi ministr.
Qazirgi tańda Qazaqstanda tórt óńirde — Jambyl, Pavlodar, Batys Qazaqstan jáne Shyǵys Qazaqstan oblystarynda kóterme-taratý saýda ortalyqtaryn salý jumystary júrgizilip jatyr. Mańǵystaý oblysynda kóterme-taratý satý ortalyǵynyń qurylysy 2020 jylǵa josparlanǵan. Aldaǵy ýaqytta úsh óńirde — Aqtóbe, Almaty jáne Semei qalalarynda taratý ortalyqtaryn salý kózdelgen.
«Búginde úsh óńir kóterme-taratý saýda ortalyqtaryn salýmen ainalysýda. Investorlar men jer telimderi anyqtaldy. Biz óz tarapymyzdan osy nysandardy qarjylandyrýǵa memlekettik qoldaý kórsetemiz», — dedi ministr.
Sonymen qatar, B. Sultanov jańadan qurylǵan Saýda jáne integratsiia ministrliginiń fýnktsiialaryna baǵanyń turaqtylyǵy men ónim sapasy máselelerin qadaǵalaý kiretinin atap ótti.
