Ortalyq Aziia elderi qaýipsizdik salasyndaǵy yntymaqtastyq máselelerin talqylady, dep habarlaidy Syrtqy ister ministrligi.
Qazaqstan Respýblikasy Syrtqy ister ministriniń orynbasary Erjan Ashyqbaev BUU-nyń Ortalyq Aziia úshin preventivtik diplomatiia jónindegi óńirlik ortalyǵy (OAPDÓO) uiymdastyrǵan Ortalyq Aziia jáne Aýǵanstan syrtqy ister ministrleriniń orynbasarlarynyń onlain-kezdesýine qatysty.
Is-sharaǵa BUU Bas hatshysynyń saiasi máseleler jónindegi kómekshisi Miroslav Encha, EO-nyń Ortalyq Aziia boiynsha arnaiy ókili Peter Býrian jáne EQYU janjaldardy aldyn alý ortalyǵynyń direktory Týýla Iýrola qatysty.
Kezdesý barysynda qatysýshylar óńirdegi qaýipsizdikke qatysty aǵymdaǵy úrdister men oqiǵalardy, sondai-aq óńirlik yntymaqtastyqtyń ózekti máselelerin talqylady. COVID-19 pandemiiasynan týyndaǵan daǵdarysty eńserý jónindegi ulttyq bastamalar men usynystarǵa erekshe nazar aýdaryldy.
E.Ashyqbaev Qazaqstan Respýblikasy úkimetiniń daǵdarystan keiingi kezeńge kózqarasyn tanystyryp, sondai-aq qatysýshylardy elimizdiń COVID-19 jáne onyń saldarlarymen, óńirlik jáne halyqaralyq deńgeidegi kúrestegi elimizdiń úlesimen tanystyrdy. Sonymen birge, Qazaqstan Ortalyq Aziiadaǵy seriktesterine meilinshe kómek kórsetetini jáne BUU-nyń negizgi halyqaralyq bastamalaryn qoldaityndyǵy aityldy.
Syrtqy ister ministriniń orynbasary Ortalyq Aziiadaǵy seriktesterdi óńirlik qaýipsizdik salasyndaǵy yntymaqtastyqty nyǵaitýǵa, sondai-aq Ortalyq Aziia men Aýǵanstanda ornyqty damý maqsattaryn iske asyrýǵa baǵyttalǵan bastamalaryn qoldaýǵa shaqyrdy.
BUU, EO jáne EQYU ókilderi Ortalyq Aziia men Aýǵanstan memleketteriniń koronavirýs pandemiiasynyń jaǵymsyz saldaryn eńserýdegi ózara is-qimylyn oń baǵalady.
Otyrysqa qatysýshylar OAPDÓO, EO jáne EQYU-nyń óńirlik yntymaqtastyqty ilgeriletý jáne óńirdegi beibitshilik pen qaýipsizdikti nyǵaitý jónindegi kúsh-jigerin qoldaitynyn bildirdi.
Aita keteiik, Qazaqstannyń Tuńǵysh Prezidenti – Elbasy N.Nazarbaev 2007 jylǵy jeltoqsanda OAPDÓO qurýda bastamashy boldy. Álemde osyndai BUU-nyń úsh ortalyǵy bar: bireýi - Ortalyq Aziiada jáne ekeýi - Afrikada.
Ortalyq qaqtyǵystardyń aldyn alýǵa jáne qazirgi zamanǵy qaýip-qaterlerge qarsy turý salasyndaǵy óńirlik kúshterge qoldaý kórsetedi.
