Ortalyq Afrika respýblikasynda (OAR) kólik minany basyp ketip, jarylǵan. Sonyń saldarynan Reseidiń úsh azamaty jáne jergilikti eki politsei qaza bolyp, birneshe adam jaralanǵan. Bul týraly 30 mamyrda úkimettegi derekkózge súiengen AFP agenttigi habarlady. Bul aqparatty BUU-daǵy derekkózder de rastady.
Oqiǵa 27 mamyrda OAR astanasy Bangi qalasynan 400 shaqyrym jerde Berberati men Býar qalalaryn jalǵaityn shossede bolǵan. Qaza tapqandar men jaralanǵandardy evakýatsiialaý úshin oqiǵa ornyna reseilik tikushaq jiberilgen.
AFP jazýynsha, Afrikanyń kedei eline eleýli yqpaly bar Resei OAR armiiasyn áskeri ázirlikten ótkizip, jattyqtyrady. Byltyr ondaǵy áskeri kontingent júzdegen reseilik jańa jartylai áskeri toptarmen tolyqqan edi. Olar Rýanda armiiasymen birigip ereýilshilermen qaqtyǵysyp jatqan prezident Fosten Arkanj Toýaderdi qoldaidy.
OAR biligi Reseimen ekijaqty kelisimderde onyń azamattaryn "áskeri qyzmetker" dep ataǵan. Alaida keiinirek Máskeý terminologiiany ózgertip, OAR-daǵy azamattaryn "instrýktor" dep atai bastady.
Ondaǵy "instrýktorlardyń" Vagner tobynyń músheleri ekenin dáleldeitin kóptegen derek pen aiǵaq bar.
Shamamen bes million halqy bar OAR-da prezident jaqtastary men 2013 jyly úkimetti qulatqan qarýly toptar arasynda jeti jyldan beri qarýly qaqtyǵys jalǵasyp jatyr.
