Memleket basshysy Nursultan Nazarbaev Halyqaralyq Araldy qutqarý qorynyń quryltaishy memleketteri basshylarynyń sammitine qatysý úshin Túrikmenbashy qalasyna keldi, dep habarlaidy QazAqparat tilshisi.
Sapar barysynda Elbasy memleketter basshylarynyń shaǵyn jáne keńeitilgen quramdaǵy otyrystaryna qatysyp, Túrikmenstan Prezidenti Gýrbangýly Berdimuhamedovpen kezdesedi dep josparlanǵan.
Aita keteiik, 1993 jyldyń 4 qańtarynda Tashkentte Ortalyq Aziia memleketteriniń basshylary Halyqaralyq Araldy qutqarý qoryn qurý týraly birlesken kommiýnike qabyldaǵan bolatyn. Sol jyldyń 26 naýryzynda Qyzylordada Ortalyq Aziia memleketteriniń basshylary Aral teńizi men Aral mańy problemasyn sheshý, Aral teńizin saýyqtyrý jáne áleýmettik-ekonomikalyq damýyn qamtamasyz etý jónindegi birlesken is-qimyl týraly sheshim qabyldaǵan edi. Munan keiin de Memleket basshylary birneshe márte bas qosyp, teńizdiń problemalyq máselelerin talqylady. Al sońǵy kezdesý osydan 9 jyl buryn (2009) Almaty qalasynda ótti.
Aita keterligi, elimiz Táýelsizdik alǵan jyldan bastap-aq Elbasy Nursultan Nazarbaev Aral problemasyna álemdik qoǵamdastyq nazaryn jii aýdartyp, Birikken Ulttar Uiymynyń biik minberinde de kótergen edi. Máselen, 2017 jyly 27 qyrkúiekte BUU-nyń 2015 jyldan keiingi damý kezeńine arnalǵan kún tártibin qabyldaý jónindegi sammit barysynda Qazaqstan Prezidenti: «Joiylyp bara jatqan Aral teńiziniń máselesi bizdiń óńirge ǵana emes, búkil álemge qater tóndiredi. Teńizdiń tartylýy saldarynan jyl saiyn 75 million tonnaǵa deiin shań men ýly tuzdy jel kóterip, onyń tozańy qazirdiń ózinde Eýropa men Antarktidadan tabylyp otyr. Dúniejúzilik banktiń qoldaýymen biz Aral teńiziniń soltústik bóligin qalpyna keltirdik. Biz BUU-men jáne halyqaralyq qoǵamdastyqpen burynǵy Semei iadrolyq poligony aimaǵyn saýyqtyrý jóninde belsendi túrde yntymaqtastyq ornatyp otyrmyz. Ortalyq Aziia elderi bul ekologiialyq problemalarmen kúresý úshin kómek kútedi», - degen bolatyn.
