Soltústik Qazaqstan oblysynyń Ǵ.Músirepov aýdanynda demalysta júrgen órt sóndirýshi Iliias Bahmanov otqa oranǵan úiden eki adamdy alyp shyǵyp, ólimnen aman alyp qaldy, dep habarlaidy "Ult aqparat".
SQO Tótenshe jaǵdailar departamenti baspasóz qyzmetiniń málimetinshe, oqiǵa 5 aqpan túngi saǵat 2.00 shamasynda Novoishimka eldi mekeninde bolǵan. Ǵ.Músirepov aýdandyq №16 órt bólimi bastyǵynyń orynbasary, 26 jastaǵy Iliias Bahmanov kele jatyp, Engels kóshesindegi 8 úidiń janyp jatqanyn baiqaidy. Turǵyn úidiń shatyryn jailaǵan jalyn, qora-jaiǵa aýysa bastaǵan.
«Birden úige júgirdim. Esikti ashylmady, ishinen jabylypty. «Iaǵni, úide adamdar bar, olarǵa tez kómektesý kerek» degen oi keldi. Órtke qarsy qyzmettiń jaýyngerlik jarǵysyna sai birden kezekshi bólimge habar berdim de, kireberistiń terezesin syndyryp, ishke kirdim. Qoiý tútinniń arasynan uiyqtap jatqan áieldi taptym. Oiatyp, taza aýaǵa alyp shyqtym», - deidi Ilias ótken túndi eske alyp.
Dalada esin jiǵan 63 jastaǵy áiel úide 68 jastaǵy kúieýiniń qalǵanyn aitqan.
«Bári sanaýly minýtta bolǵanymen, maǵan uzaq ýaqyt ótkendei kórindi. Jalyn kúsheie túskendikten úige kirýge seskengenimdi jasyrmaimyn, biraq, ishtegi adamdy alyp shyǵýǵa bel býdym. Tútinnen dym kórinbeidi. Túrtinektep júrip, túkpir bólmelerdiń birinen es-tússiz jatqan er adamdy taýyp, arqalap alyp shyqtym. Alǵashqy kómek kórsetip, jedel járdem qyzmetin shaqyrdym. Bul ýaqytta áriptesterim de jetip úlgergen edi», - deidi Iliias.
Órt sóndirýshiler «Hlebnaia baza №2» JShS kómegimen órtti der kezinde aýyzdyqtady. Úiden 4 gaz ballony shyǵaryldy. Jalynnan úidiń shatyry jáne jaqyn ornalasqan qora-jai zaqymdandy. Úidiń ishi men dúnie-múlikke zaqym kelgen joq.
