Foto: Halyk Uni
Májilis depýtaty Nartai Aralbaiuly Úkimet ókilderiniń «2023 jyldyń 1 shildesinen bastap ormanshylardyń jalaqysy ósedi» degen ýádesi áli oryndalmai jatqanyn aityp, Premer-ministrdiń birinshi orynbasary Roman Skliarǵa saýal joldady, dep habarlaidy "Ult aqparat".
"Jalaqy orman sharýashylyǵyndaǵy basshylyq quram men sanaýly mamandyq iesine qosylǵany bolmasa orman úshin ot keshken myńdaǵan maman túkke jetpeitin jalaqymen sol kúii qala berdi", - deidi depýtat.
Aitýynsha, máseleni byltyr qyrkúiekte Májilistiń tórinde kótergeninde Úkimet ókilderi, salalyq ministr «jalaqyny ósiremiz» dep ýáde bergen edi. Bul joly ottan kóilek kiip orman órtimen kúresetin mamandardyń jalaqysy óser dep qatty úmittengenimen, 1 jyl degende aqjoltai aqparat keldi.
"2024 jyldyń 1 shildesinde Premer-Ministr Oljas Bektenov elimizdegi orman sharýashylyǵy jáne tabiǵatty qorǵaý mekemeleri qyzmetkerleriniń laýazymdyq jalaqylaryna ústemaqy qosý týraly qaýlyǵa qol qoidy. Orman jáne tabiǵatty qorǵaý uiymdary qyzmetkerlerine eńbekaqy tóleý júiesin, sharttary men mólsherlerin jetildirý maqsatynda «Azamattyq qyzmetshilerge, memlekettik biýdjet qarajaty esebinen qarjylandyrylatyn uiymdardyń qyzmetkerlerine eńbekaqy tóleý júiesi týraly» Qazaqstan Respýblikasy Úkimetiniń qaýlysyna ózgerister engizildi. Bórkimizdi aspanǵa atyp alaqailadyq.
Qujatqa sáikes, orman órtin sóndirý beketteriniń, orman sharýashylyǵy mekemeleriniń, qorshaǵan ortany qorǵaý jáne orman ornalastyrý uiymdarynyń qyzmetkerleri laýazymdyq jalaqylaryna 100 paiyzǵa deiin ósimaqy alýy kerek edi. Olardyń qatarynda orman órtin sóndirýshiler, órt sóndirý kóliginiń júrgizýshileri, traktorshylar, radio operatorlar, órt sóndirý mashinalaryn, jabdyqtar men apparattardy jóndeý jónindegi sheberler, órt baqylaý munarasynyń baqylaýshylary bar edi. Shilińgir shildeden bastap jalaqymyz eselep artady dep eldiń eńsesi tiktelip qaldy. Biraq, 2023 jyly úmitiniń kúli kókke ushqan ormanshylar 2024 jyly da dál sol jaǵdaidy bastan keshýde. Sebebi atalǵan qaýly Qyzylorda oblysynda, Aral aýdanynda, Pavlodar oblysynda, Mańǵystaý oblysynda, Qostanai oblysynda, Jetisý oblysynda oryndalmady degen derek keldi. Ormanshylardyń jazǵan aryzy da mine meniń qolymda", - deidi Nartai Sársenǵaliev.
Depýtattyń sózinshe, ormanshylardyń jalaqysyn kóterýdiń júgi jergilikti biýdjetke artylǵan, alaida ol qambada qarjy joq eken. Qaýlysy bar da qarjysy joq. Saldary aýyr, jalaqynyń tómendiginen jastar ormanshy bolyp qyzmetke barǵysy kelmeidi. Orman bar, oryn bos, jalaqy jetpeidi.
"Joǵaryda aitylǵan máselelerdi zerdelep, 2024 jyldyń 1 shildesinde qol qoiylǵan qaýlynyń tolyqqanda oryndalýyn qadaǵalap, Qazaqstandaǵy orman sharýashylyǵyndaǵy mamandardyń laýazymdyq jalaqylaryna 100 paiyzdyq ósimaqynyń qosylýyn qamtamassyz etýińizdi suraimyn", - dep túiindedi Sársenǵaliev.
